ഇന്ത്യൻ കമ്പനികൾ അമേരിക്കയിൽ തങ്ങളുടെ ബിസിനസ്സ് പ്രവർത്തനങ്ങൾ വ്യാപിപ്പിക്കുന്നത് തുടരുകയാണെന്ന് ഇന്ത്യയിലെ യു.എസ് അംബാസഡർ സെർജിയോ ഗോർ . വാർഷിക ‘സെലക്ട് ഇൻവെസ്റ്റ്‌മെന്റ് സമ്മിറ്റിൽ’ ഇന്ത്യൻ കമ്പനികൾ 20 ബില്യൺ ഡോളറിലധികം നിക്ഷേപം വാഗ്ദാനം ചെയ്തതിൽ താൻ അങ്ങേയറ്റം സന്തുഷ്ടനാണെന്നും അദ്ദേഹം പറഞ്ഞു. ദേശീയ തലസ്ഥാനത്ത് നടന്ന അമേരിക്കൻ ചേംബർ ഓഫ് കൊമേഴ്‌സ് ഇൻ ഇന്ത്യയുടെ യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.
20 ബില്യൺ ഡോളർ എന്നത് വളരെ വലിയൊരു തുകയാണെന്ന് മാത്രമല്ല, അമേരിക്കയിലേക്ക് നിക്ഷേപം ആകർഷിക്കാൻ ലോകമെമ്പാടുമുള്ള യു.എസ് എംബസികൾ മത്സരിക്കുന്ന സാഹചര്യത്തിൽ, ഇന്ത്യൻ പങ്കാളികളുമായി ചേർന്ന് പ്രവർത്തിച്ച തങ്ങളുടെ എംബസി ആഗോളതലത്തിൽ ഒന്നാം സ്ഥാനം നേടിയത് അവിശ്വസനീയമായ നേട്ടമാണെന്നും അദ്ദേഹം കൂട്ടിച്ചേർത്തു.
ഇതോടൊപ്പം തന്നെ അമേരിക്കൻ കമ്പനികളും അതിവേഗം വളരുന്ന ഇന്ത്യൻ വിപണിയിൽ തങ്ങളുടെ സാന്നിധ്യം വർദ്ധിപ്പിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. അമേരിക്കൻ ബിസിനസുകൾക്കും തൊഴിലാളികൾക്കും ലാഭകരമായ അവസരങ്ങൾ സൃഷ്ടിക്കാനാണ് യു.എസ് പ്രസിഡന്റ് ആഗ്രഹിക്കുന്നതെന്ന് ഗോർ പറഞ്ഞു. ഇരുരാജ്യങ്ങളും തമ്മിലുള്ള താൽക്കാലിക വ്യാപാര കരാറിന് (Interim Trade Agreement) അന്തിമരൂപം നൽകാൻ ഇപ്പോൾ സമയമായിരിക്കുകയാണെന്നും ഇത് ഇരു രാജ്യങ്ങൾക്കും വലിയ തോതിൽ പ്രയോജനകരമാണെന്നും അദ്ദേഹം വ്യക്തമാക്കി.