കാനഡയുടെ സമുദ്രസുരക്ഷയും ആർട്ടിക് മേഖലയിലെ സാന്നിധ്യവും കൂടുതൽ ശക്തിപ്പെടുത്തുന്നതിനായി ക്യൂബെക്കിൽ ആറ് പുതിയ പോളാർ ഐസ്‌ബ്രേക്കറുകൾ നിർമ്മിക്കാൻ 11 ബില്യൺ കാനഡൻ ഡോളറിന്റെ പദ്ധതിക്ക്പ്രധാനമന്ത്രി മാർക്ക് കാർണി പ്രഖ്യാപനം നടത്തി. രാജ്യത്തിന്റെ National Shipbuilding Strategyയുടെ ഭാഗമായാണ് ഈ വൻ നിക്ഷേപം. ആർട്ടിക് മേഖലയിലെ കാനഡയുടെ പരമാധികാരം ഉറപ്പാക്കുന്നതിനും കോസ്റ്റ് ഗാർഡിന്റെ പ്രവർത്തനശേഷി വർധിപ്പിക്കുന്നതിനും ഈ പദ്ധതി നിർണായകമാണെന്ന് കാർണി പറഞ്ഞു.
ക്യൂബെക്കിലെ Davie Shipbuilding യാർഡിലാണ് പുതിയ ഐസ്‌ബ്രേക്കറുകൾ നിർമ്മിക്കുക. കാനഡൻ കോസ്റ്റ് ഗാർഡിന്റെ പഴക്കംചെന്ന കപ്പലുകൾക്ക് പകരമായി എത്തുന്ന ഈ ആധുനിക കപ്പലുകൾ വർഷം മുഴുവൻ മഞ്ഞുപാളികളിലൂടെ സഞ്ചരിക്കാൻ ശേഷിയുള്ളവയായിരിക്കും. ആർട്ടിക് മേഖലയിലെ ചരക്ക് ഗതാഗതം, തിരച്ചിൽ-രക്ഷാപ്രവർത്തനങ്ങൾ, പരിസ്ഥിതി സംരക്ഷണം, അടിയന്തര സഹായ ദൗത്യങ്ങൾ, ശാസ്ത്രീയ ഗവേഷണ പ്രവർത്തനങ്ങൾ എന്നിവയിൽ ഇവ പ്രധാന പങ്ക് വഹിക്കും.
ഈ പദ്ധതിയിലൂടെ ക്യൂബെക്കിലും മറ്റ് പ്രദേശങ്ങളിലുമായി ആയിരക്കണക്കിന് നേരിട്ടും പരോക്ഷമായും തൊഴിലവസരങ്ങൾ സൃഷ്ടിക്കപ്പെടുമെന്നാണ് ഫെഡറൽ സർക്കാർ പ്രതീക്ഷിക്കുന്നത്. സ്റ്റീൽ, എൻജിനിയറിങ്, സമുദ്രസാങ്കേതികവിദ്യ, വിതരണ ശൃംഖല എന്നിവ ഉൾപ്പെടെയുള്ള നിരവധി അനുബന്ധ മേഖലകൾക്കും പദ്ധതി വലിയ സാമ്പത്തിക ഉത്തേജനം നൽകുമെന്ന് സർക്കാർ വിലയിരുത്തുന്നു. ആഭ്യന്തര കപ്പൽനിർമാണ വ്യവസായത്തെ കൂടുതൽ മത്സരക്ഷമമാക്കുന്നതിനും കാനഡയുടെ വ്യാവസായിക ശേഷി വർധിപ്പിക്കുന്നതിനും ഇത് സഹായിക്കുമെന്ന് അധികൃതർ പറഞ്ഞു.
ആർട്ടിക് മേഖലയിൽ റഷ്യയും ചൈനയും ഉൾപ്പെടെയുള്ള രാജ്യങ്ങളുടെ സാന്നിധ്യം വർധിക്കുന്ന സാഹചര്യത്തിൽ, കാനഡയുടെ സുരക്ഷയും പരമാധികാരവും ഉറപ്പാക്കേണ്ടത് കൂടുതൽ പ്രധാന്യമാർജിച്ചിരിക്കുകയാണ്. അതിനാൽ ആധുനിക ഐസ്‌ബ്രേക്കറുകൾ കാനഡയുടെ പ്രതിരോധ-സുരക്ഷാ തന്ത്രത്തിന്റെ ഭാഗമായും പ്രവർത്തിക്കുമെന്ന് സർക്കാർ വ്യക്തമാക്കി. വടക്കൻ സമൂഹങ്ങളിലേക്കുള്ള അവശ്യസാധനങ്ങളുടെ വിതരണവും സമുദ്രപാതകളുടെ സുരക്ഷയും ഉറപ്പാക്കുന്നതിലും പുതിയ കപ്പലുകൾ നിർണായക പങ്ക് വഹിക്കും.
വ്യവസായ വിദഗ്ധരുടെ അഭിപ്രായത്തിൽ, കാനഡയുടെ ചരിത്രത്തിലെ ഏറ്റവും വലിയ കപ്പൽനിർമാണ നിക്ഷേപങ്ങളിൽ ഒന്നാണ് ഈ പദ്ധതി. ദീർഘകാല സാമ്പത്തിക വളർച്ചയ്ക്കും ഉയർന്ന നൈപുണ്യമുള്ള തൊഴിലവസരങ്ങൾ സൃഷ്ടിക്കുന്നതിനും ഇത് സഹായിക്കുമെന്നാണ് വിലയിരുത്തൽ. ആർട്ടിക്കിലെ വർധിച്ചുവരുന്ന തന്ത്രപ്രധാന മത്സരത്തിന്റെ പശ്ചാത്തലത്തിൽ, രാജ്യത്തിന്റെ സമുദ്രശേഷി ശക്തിപ്പെടുത്തുന്നതിനുള്ള നിർണായക നീക്കമായാണ് ഈ പ്രഖ്യാപനത്തെ നിരീക്ഷകർ കാണുന്നത്.