നെറ്റ്ഫ്ലിക്സ്, ഡിസ്നി+, ആമസോൺ പ്രൈം വീഡിയോ, ആപ്പിൾ ടിവി+ തുടങ്ങിയ വിദേശ സ്ട്രീമിംഗ് സേവനങ്ങൾ കാനഡയിലെ പ്രാദേശിക സിനിമ, ടെലിവിഷൻ, വാർത്താ മേഖലകൾക്ക് നിർബന്ധിത സാമ്പത്തിക സംഭാവന നൽകണമെന്ന നയം പിൻവലിക്കാൻ കാനഡ സർക്കാർ ഒരുങ്ങുന്നു. രാജ്യത്തെ വിനോദ-മാധ്യമ മേഖലയിലെ പ്രധാന നയമാറ്റങ്ങളിലൊന്നായാണ് ഈ തീരുമാനം വിലയിരുത്തപ്പെടുന്നത്.
2023-ൽ പ്രാബല്യത്തിൽ വന്ന Online Streaming Act പ്രകാരം, കാനഡയിൽ വാർഷിക വരുമാനം നിശ്ചിത പരിധിക്ക് മുകളിലുള്ള വലിയ സ്ട്രീമിംഗ് കമ്പനികൾ തങ്ങളുടെ കനേഡിയൻ വരുമാനത്തിന്റെ ഒരു വിഹിതം പ്രാദേശിക ഉള്ളടക്ക നിർമാണത്തിനും വാർത്താ സംരംഭങ്ങൾക്കും സംഭാവന ചെയ്യണമെന്ന വ്യവസ്ഥ കൊണ്ടുവന്നിരുന്നു. പിന്നീട് CRTCഈ സംഭാവന 5 ശതമാനത്തിൽ നിന്ന് 15 ശതമാനമായി ഉയർത്താനുള്ള നടപടികളും പ്രഖ്യാപിച്ചിരുന്നു.
എന്നാൽ ഈ നയം ഉപഭോക്താക്കൾക്ക് അധിക ചെലവ് വരുത്തുമെന്നും, കമ്പനികൾ സബ്സ്ക്രിപ്ഷൻ നിരക്കുകൾ വർധിപ്പിക്കാൻ സാധ്യതയുണ്ടെന്നുമുള്ള ആശങ്കകൾ ഉയർന്നതിനെ തുടർന്നാണ് സർക്കാർ നിലപാട് മാറ്റുന്നത്. നിർബന്ധിത സംഭാവനയ്ക്ക് പകരം കനേഡിയൻ സാംസ്കാരിക-സൃഷ്ടിപര മേഖലകളെ സർക്കാർ നേരിട്ട് ധനസഹായം നൽകി പിന്തുണയ്ക്കുന്ന പുതിയ മാതൃക നടപ്പാക്കാനാണ് ആലോചന.
ഈ തീരുമാനത്തെ അമേരിക്കൻ സ്ട്രീമിംഗ് കമ്പനികൾ സ്വാഗതം ചെയ്തേക്കുമെന്നാണ് വിലയിരുത്തൽ. മുമ്പ് ഈ നിയമം കാനഡ-അമേരിക്ക വ്യാപാരബന്ധങ്ങളിൽ പുതിയ തർക്കങ്ങൾക്ക് കാരണമായിരുന്നു. മറുവശത്ത്, കാനഡയിലെ നിരവധി പ്രാദേശിക ബ്രോഡ്കാസ്റ്റർമാരും സാംസ്കാരിക സംഘടനകളും ഈ നയം പിൻവലിക്കുന്നത് ആഭ്യന്തര സിനിമ, ടെലിവിഷൻ, വാർത്താ നിർമ്മാണ മേഖലകളുടെ വരുമാനത്തെ ബാധിക്കുമെന്ന ആശങ്കയും പ്രകടിപ്പിച്ചിട്ടുണ്ട്.
സർക്കാർ ഉടൻ തന്നെ ഔദ്യോഗിക നയനിർദേശം പുറത്തിറക്കുമെന്നാണ് റിപ്പോർട്ടുകൾ. അതേസമയം, Online Streaming Act പൂർണമായും റദ്ദാക്കില്ലെന്നും, കനേഡിയൻ ഉള്ളടക്ക സൃഷ്ടിക്ക് പിന്തുണ തുടരുമെന്നും സർക്കാർ വ്യക്തമാക്കിയിട്ടുണ്ട്. ഉപഭോക്താക്കൾക്ക് സേവനങ്ങളുടെ വില വർധിക്കാതെയും കനേഡിയൻ സാംസ്കാരിക മേഖലയെ സംരക്ഷിക്കാനുമുള്ള സന്തുലിത സമീപനമാണ് പുതിയ നയത്തിന്റെ ലക്ഷ്യമെന്ന് സർക്കാർ അറിയിച്ചു.