പശ്ചിമേഷ്യയിലെ യുഎസ്-ഇറാൻ യുദ്ധം മൂലമുണ്ടായ സാമ്പത്തിക വെല്ലുവിളികളും വിതരണ ശൃംഖലയിലെ തടസ്സങ്ങളും മറികടക്കാൻ ഇന്ത്യയ്ക്ക് കൂട്ടായ പങ്കാളിത്തം വേണമെന്ന് പ്രധാനമന്ത്രി നരേന്ദ്ര മോദി. ആഗോള സംഘർഷത്തെ നേരിടാൻ തദ്ദേശീയമായി നിർമ്മിച്ച ഉൽപ്പന്നങ്ങൾ വാങ്ങുന്നതിനും ആഭ്യന്തര വിനോദസഞ്ചാരം തിരഞ്ഞെടുക്കുന്നതിനും ഊന്നൽ നൽകുന്ന ഒരു ‘സ്വദേശി’ മുന്നേറ്റം ആവശ്യമാണെന്ന് ഹൈദരാബാദിൽ നടന്ന പൊതുസമ്മേളനത്തിൽ സംസാരിക്കവെ പ്രധാനമന്ത്രി പറഞ്ഞു.
വിതരണ ശൃംഖല പ്രതിസന്ധിയിലായിരിക്കുമ്പോൾ നാം എന്ത് നടപടികൾ സ്വീകരിച്ചാലും ബുദ്ധിമുട്ടുകൾ വർദ്ധിക്കുകയേയുള്ളൂ. അതിനാൽ ഭാരതമാതാവിനെ മുൻനിർത്തി ഒത്തൊരുമയോടെ പോരാടണം. രാജ്യത്തിന് വേണ്ടി മരിക്കുന്നത് മാത്രമല്ല, രാജ്യത്തിന് വേണ്ടി ജീവിക്കുന്നതും കടമകൾ നിറവേറ്റുന്നതും ദേശസ്നേഹമാണെന്നും അദ്ദേഹം ഓർമ്മിപ്പിച്ചു.
മെട്രോകളും പൊതുഗതാഗത സംവിധാനങ്ങളും പരമാവധി പ്രയോജനപ്പെടുത്തി പെട്രോൾ, ഡീസൽ ഉപഭോഗം കുറയ്ക്കാൻ പ്രധാനമന്ത്രി പൗരന്മാരോട് അഭ്യർത്ഥിച്ചു. സ്വകാര്യ വാഹനങ്ങൾ ആവശ്യമുള്ളപ്പോൾ കാർ പൂളിംഗ് തിരഞ്ഞെടുക്കണമെന്നും ഇലക്ട്രിക് വാഹനങ്ങളുള്ളവർ അവ പരമാവധി ഉപയോഗിക്കാൻ ശ്രമിക്കണമെന്നും അദ്ദേഹം പറഞ്ഞു.