കനേഡിയൻ ഉൽപ്പന്നങ്ങൾക്ക് മേൽ 50 ശതമാനം തീരുവ ചുമത്തുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ പുതിയ ഭീഷണിക്ക് മറുപടിയായി അമേരിക്കൻ മദ്യ ഉൽപ്പന്നങ്ങൾക്ക് നിരോധനം ഏർപ്പെടുത്താൻ ആൽബർട്ട സർക്കാർ ഉദ്ദേശിക്കുന്നില്ലെന്ന് പ്രീമിയർ ഡാനിയേൽ സ്മിത്ത് വ്യക്തമാക്കി.
ശനിയാഴ്ച പ്രവിശ്യാതല റേഡിയോ പരിപാടിയിൽ സംസാരിക്കവെയാണ് സ്മിത്ത് നിലപാട് വ്യക്തമാക്കിയത്. അമേരിക്കൻ മദ്യ ഉൽപ്പന്നങ്ങൾ വിൽക്കണമോ വേണ്ടയോ എന്ന കാര്യത്തിൽ റീട്ടെയിലർമാർക്കും അവ വാങ്ങണമോ എന്ന കാര്യത്തിൽ ഉപഭോക്താക്കൾക്കും തീരുമാനമെടുക്കാമെന്നാണ് സ്മിത്തിന്റെ നിലപാട്.
മദ്യ ഉൽപ്പന്നങ്ങൾക്ക് പൂർണമായ നിരോധനം ഏർപ്പെടുത്തുന്നത് അസാധാരണമായ നടപടിയാണെന്നും വ്യാപാര തർക്കത്തിന് മറുപടിയായി അത്തരമൊരു നടപടി സ്വീകരിക്കാൻ താൻ ആഗ്രഹിക്കുന്നില്ലെന്നും സ്മിത്ത് പറഞ്ഞു.
ട്രംപിന്റെ മുൻ തീരുവ ഭീഷണികൾക്കും കാനഡയെ സംബന്ധിച്ച വിവാദ പരാമർശങ്ങൾക്കും പിന്നാലെ കഴിഞ്ഞ വർഷം നിരവധി പ്രവിശ്യകൾ അമേരിക്കൻ മദ്യ ഉൽപ്പന്നങ്ങളുടെ വാങ്ങൽ നിർത്തിവച്ചിരുന്നു. ആൽബർട്ടയും സസ്‌കാച്ചെവാനും പിന്നീട് അമേരിക്കൻ മദ്യ ഉൽപ്പന്നങ്ങൾ വീണ്ടും വിപണിയിലെത്തിച്ചപ്പോൾ, ഒന്റാറിയോയും ക്യൂബെക്കും ഉൾപ്പെടെയുള്ള പ്രധാന വിപണികൾ ഇപ്പോഴും യുഎസ് മദ്യത്തിന്റെ വാങ്ങൽ പുനരാരംഭിച്ചിട്ടില്ല.
പ്രതികാര നടപടികളേക്കാൾ ശാന്തമായ സമീപനമാണ് വേണ്ടതെന്നും അമേരിക്കക്കാരുടെ പിന്തുണ നേടാനുള്ള ശ്രമങ്ങളാണ് കൂടുതൽ ഫലപ്രദമെന്നും സ്മിത്ത് വ്യക്തമാക്കി.
അതേസമയം, ട്രംപിന്റെ പുതിയ തീരുവ ഭീഷണിയെ തുടർന്ന് കാനഡ–യുഎസ് വ്യാപാരബന്ധത്തിൽ വീണ്ടും സമ്മർദ്ദം ശക്തമായിരിക്കുകയാണ്. ഫെഡറൽ സർക്കാർ ഉൾപ്പെടെ വിവിധ തലങ്ങളിൽ അമേരിക്കൻ നടപടികൾക്ക് എങ്ങനെ പ്രതികരിക്കണമെന്ന ചർച്ചകളും തുടരുകയാണ്.