പശ്ചിമേഷ്യൻ യുദ്ധം ജൂൺ മാസം വരെ നീണ്ടുനിൽക്കുകയാണെങ്കിൽ ഇന്ത്യയിൽ ഇന്ധനവില ഇനിയും കുത്തനെ ഉയർന്നേക്കുമെന്നും പണപ്പെരുപ്പം വർദ്ധിക്കുമെന്നും സാമ്പത്തിക വളർച്ച മന്ദഗതിയിലാകുമെന്നും അന്താരാഷ്ട്ര നാണയ നിധി (IMF) മുൻ ഡെപ്യൂട്ടി മാനേജിംഗ് ഡയറക്ടറും ഹാർവാർഡ് സർവ്വകലാശാല പ്രൊഫസറുമായ ഗീത ഗോപിനാഥ് മുന്നറിയിപ്പ് നൽകി.
പ്രതിസന്ധി കടുക്കുകയാണെങ്കിൽ അന്താരാഷ്ട്ര വിപണിയിൽ അസംസ്കൃത എണ്ണവില (Crude oil) ബാരലിന് 140 യുഎസ് ഡോളർ വരെ ഉയർന്നേക്കാമെന്നും അവർ ചൂണ്ടിക്കാണിച്ചു. ഇന്ത്യാ ടുഡേ ടിവിക്ക് നൽകിയ പ്രത്യേക അഭിമുഖത്തിൽ സംസാരിക്കുകയായിരുന്നു അവർ.
നിലവിലെ പശ്ചിമേഷ്യൻ പ്രതിസന്ധി കേവലം വിലവർദ്ധനവിൽ മാത്രം ഒതുങ്ങുന്നില്ലെന്നും, ഇത് എണ്ണ, എൽപിജി (LPG), എൽഎൻജി (LNG), രാസവളങ്ങൾ എന്നിവയുടെ ലഭ്യതയെ പൂർണ്ണമായി ബാധിക്കുന്ന ഒരു “ആഗോള വിതരണ തടസ്സമായി” (Global supply shock) മാറിയിരിക്കുകയാണെന്നും അവർ പറഞ്ഞു. “ഇന്ധനത്തിനായി മിഡിൽ ഈസ്റ്റിനെ വളരെയധികം ആശ്രയിക്കുന്ന ഇന്ത്യയിൽ ഇതിന്റെ ആഘാതം വ്യക്തമായി ദൃശ്യമാണ്. ഇത് കേവലം വിലയെക്കുറിച്ച് മാത്രമല്ല, വിപണിയിലുണ്ടാകുന്ന കടുത്ത ക്ഷാമത്തെക്കുറിച്ച് കൂടിയാണ്,” ഗീത ഗോപിനാഥ് വ്യക്തമാക്കി.
ഹോർമുസ് കടലിടുക്കിലെ (Strait of Hormuz) സംഘർഷങ്ങൾ കാരണം ആഗോള ഊർജ്ജ വിതരണ ശൃംഖല തടസ്സപ്പെടുകയും വിവിധ രാജ്യങ്ങൾ തങ്ങളുടെ അടിയന്തിര എണ്ണശേഖരത്തെ ആശ്രയിക്കാൻ നിർബന്ധിതരാകുകയും ചെയ്യുന്ന സാഹചര്യത്തിലാണ് ഈ നിരീക്ഷണം.
വിതരണ തടസ്സങ്ങൾ ജൂൺ മാസത്തിലും തുടരുകയാണെങ്കിൽ നിലവിലെ സാഹചര്യങ്ങൾ കൂടുതൽ വഷളാകുമെന്ന് ഗീത ഗോപിനാഥ് പറഞ്ഞു. നിലവിൽ എണ്ണവില ബാരലിന് 110 ഡോളറിലാണ് നിൽക്കുന്നത്. ഇതിൽ കൂടുതൽ വർദ്ധനവ് ഉണ്ടാകാതിരിക്കണമെങ്കിൽ വിപണിയിലെ ഡിമാൻഡിൽ വലിയ കുറവുണ്ടാകേണ്ടി വരും. എന്നാൽ വരും ദിവസങ്ങളിൽ, പ്രത്യേകിച്ച് ജൂൺ മാസത്തോടെ എണ്ണവില ബാരലിന് 140 ഡോളറിലേക്ക് അടുക്കാനാണ് കൂടുതൽ സാധ്യതയെന്നും അവർ വിലയിരുത്തി.
ഹോർമുസ് കടലിടുക്ക് വീണ്ടും തുറക്കാൻ അമേരിക്കൻ ഭരണകൂടം ഇടപെടുമെന്നാണ് പല സർക്കാരുകളും പ്രതീക്ഷിക്കുന്നത്, എന്നാൽ ഒരു കരാറിലെത്തിയാൽ പോലും സാധാരണ രീതിയിലുള്ള വിതരണം പുനഃസ്ഥാപിക്കാൻ രണ്ട് മുതൽ മൂന്ന് മാസം വരെ സമയമെടുക്കുമെന്നും അവർ ഓർമ്മിപ്പിച്ചു.
ഇന്ത്യയിൽ ആഭ്യന്തര ഇന്ധനവില ഇനിയും ഉയരുമോ എന്ന ചോദ്യത്തിന്, സർക്കാരിന് മുന്നിൽ മറ്റ് വഴികളില്ലെന്നായിരുന്നു ഗീത ഗോപിനാഥിന്റെ മറുപടി. കാരണം ഈ പ്രതിസന്ധി ഇന്ത്യയുടെ നിയന്ത്രണത്തിന് അപ്പുറത്തുള്ള ഒരു ബാഹ്യ ആഘാതമാണ് (External shock). പെട്രോൾ പമ്പുകളിൽ വില വർദ്ധിക്കുന്നത് വിനിയോഗത്തിൽ ആവശ്യമായ മാറ്റങ്ങൾ വരുത്താൻ ജനങ്ങളെ പ്രേരിപ്പിക്കും.