പശ്ചിമേഷ്യൻ പ്രതിസന്ധി പരിഹരിക്കുന്നതിനായി ഇറാൻ മുന്നോട്ടുവെച്ച ഏറ്റവും പുതിയ സമാധാന നിർദ്ദേശങ്ങൾ അമേരിക്കൻ പ്രസിഡന്റ് ഡൊണാൾഡ് ട്രംപ് തള്ളി. ഇറാന്റെ 14 പോയിന്റ് ചട്ടക്കൂട് അംഗീകരിക്കാനാവില്ലെന്നും നിലവിലെ വെടിനിർത്തൽ ശാശ്വത കരാറാക്കി മാറ്റാനുള്ള ഇറാന്റെ ശ്രമം തൃപ്തികരമല്ലെന്നും ട്രംപ് വ്യക്തമാക്കി.
ഇസ്രായേലി മാധ്യമമായ കാൻ ന്യൂസിന് (Kan News) നൽകിയ അഭിമുഖത്തിലാണ് ട്രംപ് തന്റെ നിലപാട് വ്യക്തമാക്കിയത്. “ഇത് എനിക്ക് അംഗീകരിക്കാനാവില്ല. ഞാൻ ഇത് വിശദമായി പഠിച്ചു, എല്ലാ കാര്യങ്ങളും പരിശോധിച്ചു. പക്ഷേ ഈ നിർദ്ദേശം സ്വീകാര്യമല്ല,” ട്രംപ് പറഞ്ഞു. ഇറാൻ ഒരു കരാറിനായി ആഗ്രഹിക്കുന്നുണ്ടെങ്കിലും അവർ വാഗ്ദാനം ചെയ്ത കാര്യങ്ങളിൽ താൻ സംതൃപ്തനല്ലെന്നും തനിക്ക് യോജിക്കാൻ കഴിയാത്ത പല കാര്യങ്ങളും അതിലുണ്ടെന്നും ടൈംസ് ഓഫ് ഇസ്രായേൽ റിപ്പോർട്ട് ചെയ്തു.
ഇറാന്റെ കഴിഞ്ഞ 47 വർഷത്തെ പ്രവർത്തനങ്ങൾക്ക് അവർ ലോകത്തിന് വലിയ വില നൽകേണ്ടി വരുമെന്ന് ട്രംപ് സോഷ്യൽ മീഡിയയിലൂടെ പ്രതികരിച്ചു. ഇറാന്റെ ആണവ പദ്ധതിയോടുള്ള അമേരിക്കയുടെ ശക്തമായ വിയോജിപ്പാണ് ട്രംപിന്റെ വാക്കുകളിൽ നിഴലിക്കുന്നത്. പാകിസ്ഥാൻ വഴി ലഭിച്ച അമേരിക്കയുടെ മറുപടി തങ്ങൾ പരിശോധിച്ചുവരികയാണെന്ന് ഇറാൻ വിദേശകാര്യ മന്ത്രാലയം സ്ഥിരീകരിച്ചു. എന്നാൽ ആണവ ചർച്ചകൾ ഇപ്പോൾ നടക്കുന്നില്ലെന്നാണ് ഇറാന്റെ പക്ഷം.