പസഫിക് സമുദ്രത്തിൽ രൂപംകൊണ്ട എൽ നിനോ (El Niño) കാലാവസ്ഥാ പ്രതിഭാസം വരും മാസങ്ങളിൽ കൂടുതൽ ശക്തിപ്രാപിക്കുമെന്ന് ലോക കാലാവസ്ഥാ സംഘടന (WMO) മുന്നറിയിപ്പ് നൽകി. ഇതോടെ ലോകത്തിന്റെ വിവിധ ഭാഗങ്ങളിൽ ഉഷ്ണതരംഗങ്ങൾ, വരൾച്ച, കനത്ത മഴ, വെള്ളപ്പൊക്കം, കാട്ടുതീ തുടങ്ങിയ അതിതീവ്ര കാലാവസ്ഥാ സംഭവങ്ങൾ വർധിക്കാൻ സാധ്യതയുണ്ടെന്നാണ് വിദഗ്ധരുടെ വിലയിരുത്തൽ.
ജൂലൈ മുതൽ സെപ്റ്റംബർ വരെയുള്ള കാലയളവിൽ എൽ നിനോ അതിവേഗം ശക്തിപ്രാപിക്കുമെന്നും നവംബർ മുതൽ ഫെബ്രുവരി വരെയാണ് സാധാരണയായി ഇതിന്റെ പരമാവധി സ്വാധീനം അനുഭവപ്പെടുന്നതെന്നും WMO അറിയിച്ചു. സമുദ്രോപരിതല താപനിലയിൽ ഉണ്ടായ ഗണ്യമായ വർധനവാണ് ഈ പ്രതിഭാസത്തിന് കാരണമാകുന്നത്. ആഗോളതാപന വർധനയും എൽ നിനോയും ഒരുമിച്ച് പ്രവർത്തിക്കുന്നതിനാൽ 2027 ചരിത്രത്തിലെ ഏറ്റവും ചൂടേറിയ വർഷമായി മാറാൻ സാധ്യതയുണ്ടെന്ന മുന്നറിയിപ്പും ശാസ്ത്രജ്ഞർ നൽകുന്നു.
എൽ നിനോയുടെ സ്വാധീനത്തിൽ ചില രാജ്യങ്ങളിൽ കടുത്ത വരൾച്ചയും ജലക്ഷാമവും അനുഭവപ്പെടുമ്പോൾ, മറ്റുചില മേഖലകളിൽ അതിശക്തമായ മഴയും വെള്ളപ്പൊക്കവും ഉണ്ടാകാം. കൃഷി, ജലസ്രോതസ്സുകൾ, വൈദ്യുതി ഉൽപാദനം, മത്സ്യബന്ധനം, പൊതുജനാരോഗ്യം എന്നിവയ്ക്കും ഇതിന്റെ ആഘാതം ഉണ്ടാകുമെന്നാണ് മുന്നറിയിപ്പ്. ലാറ്റിൻ അമേരിക്ക ഉൾപ്പെടെ നിരവധി രാജ്യങ്ങൾ ഇതിനോടകം തന്നെ ദുരന്തനിവാരണ പദ്ധതികൾ ശക്തമാക്കിയിട്ടുണ്ട്.
കാനഡയിലും സാധാരണയേക്കാൾ ഉയർന്ന താപനില അനുഭവപ്പെടാനും, ചില പ്രദേശങ്ങളിൽ വരണ്ട കാലാവസ്ഥയും കാട്ടുതീയുടെ അപകടസാധ്യതയും വർധിക്കാനും സാധ്യതയുണ്ടെന്ന് എൻവയോൺമെന്റ് ആൻഡ് ക്ലൈമറ്റ് ചെയ്ഞ്ച് കാനഡ അറിയിച്ചു. ജനങ്ങളും സർക്കാരുകളും മുൻകരുതൽ നടപടികൾ സ്വീകരിക്കേണ്ട സമയമാണിതെന്നും കാലാവസ്ഥാ വിദഗ്ധർ മുന്നറിയിപ്പ് നൽകുന്നു.