കാട്ടുതീകളിൽ നിന്നുള്ള കനത്ത പുക നഗരത്തെ മൂടിയതോടെ കാൽഗറിയിലെ വായു നിലവാരം ഗുരുതരമായി മോശമായി. Air Quality Health Index (AQHI) 10+, അഥവാ “Very High Risk”വിഭാഗത്തിലെത്തിയതോടെ ആരോഗ്യ മുന്നറിയിപ്പുകളും ശക്തമാക്കി.
നഗരത്തിന്റെ വിവിധ ഭാഗങ്ങളിൽ പുകമഞ്ഞ് അനുഭവപ്പെട്ടതോടെ ദൂരക്കാഴ്ച കുറയുകയും വായുവിലെ സൂക്ഷ്മ കണങ്ങളുടെ അളവ് ഉയരുകയും ചെയ്തു. കാനഡയിലെ പ്രധാന നഗരങ്ങളിൽ ഏറ്റവും മോശം വായു നിലവാരം രേഖപ്പെടുത്തിയ നഗരമായി കാൽഗറി മാറിയതായി റിപ്പോർട്ടുകൾ സൂചിപ്പിക്കുന്നു.
കാട്ടുതീ പുകയിലെ സൂക്ഷ്മകണങ്ങൾ ആരോഗ്യത്തിന് അപകടസാധ്യത ഉയർത്തുന്നതിനാൽ അനാവശ്യമായി പുറത്തിറങ്ങുന്നത് ഒഴിവാക്കാനും കഠിനമായ ഔട്ട്ഡോർ പ്രവർത്തനങ്ങൾ പരിമിതപ്പെടുത്താനും അധികൃതർ നിർദേശിച്ചു. പ്രത്യേകിച്ച് കുട്ടികൾ, മുതിർന്നവർ, ഗർഭിണികൾ, ഹൃദയ-ശ്വാസകോശ സംബന്ധമായ ആരോഗ്യപ്രശ്നങ്ങളുള്ളവർ എന്നിവർ കൂടുതൽ ജാഗ്രത പാലിക്കണം.
പുക മൂലം ചുമ, തലവേദന, കണ്ണിലും മൂക്കിലും തൊണ്ടയിലും അസ്വസ്ഥത, ശ്വാസതടസ്സം തുടങ്ങിയ ലക്ഷണങ്ങൾ അനുഭവപ്പെടാം. ശ്വാസംമുട്ടൽ, നെഞ്ചുവേദന തുടങ്ങിയ ഗുരുതര ലക്ഷണങ്ങൾ അനുഭവപ്പെട്ടാൽ വൈദ്യസഹായം തേടണമെന്നും ആരോഗ്യ അധികൃതർ നിർദേശിക്കുന്നു.
പുക ശക്തമായ സമയങ്ങളിൽ വീടുകളുടെ ജനലുകളും വാതിലുകളും അടച്ചിടാനും സാധ്യമെങ്കിൽ മികച്ച നിലവാരമുള്ള എയർ ഫിൽട്ടറുകളോ portable air cleaner-കളോ ഉപയോഗിക്കാനും നിർദേശമുണ്ട്. പുറത്തുപോകേണ്ട സാഹചര്യമുണ്ടെങ്കിൽ ശരിയായി ധരിക്കുന്ന N95 റെസ്പിറേറ്റർ പുകയിലെ സൂക്ഷ്മകണങ്ങളിലേക്കുള്ള സമ്പർക്കം കുറയ്ക്കാൻ സഹായിക്കും.
കാനഡയുടെ വിവിധ ഭാഗങ്ങളിൽ തുടരുന്ന കാട്ടുതീകളിൽ നിന്നുള്ള പുകയാണ് ആൽബർട്ട ഉൾപ്പെടെയുള്ള പ്രദേശങ്ങളിലെ വായു നിലവാരത്തെ ബാധിക്കുന്നത്. കാറ്റിന്റെ ദിശയും വേഗവും മാറുന്നതിനനുസരിച്ച് പുകയുടെ സാന്ദ്രത വളരെ വേഗത്തിൽ കൂടുകയോ കുറയുകയോ ചെയ്യാമെന്ന് കാലാവസ്ഥാ വിദഗ്ധർ ചൂണ്ടിക്കാട്ടുന്നു.
കാൽഗറിയിലെ വായു നിലവാരത്തിൽ മാറ്റങ്ങൾ ഉണ്ടാകാൻ സാധ്യതയുള്ളതിനാൽ Environment and Climate Change Canada നൽകുന്ന ഏറ്റവും പുതിയ AQHI വിവരങ്ങളും ആരോഗ്യ മുന്നറിയിപ്പുകളും പരിശോധിക്കണമെന്ന് അധികൃതർ അഭ്യർഥിച്ചു.