അമേരിക്കയിൽ പഠനം ലക്ഷ്യമിടുന്ന വിദേശ വിദ്യാർത്ഥികൾക്കുള്ള സ്റ്റുഡന്റ് വിസാ (F), എക്സ്ചേഞ്ച് വിസിറ്റർ (J), വിദേശ മാധ്യമപ്രവർത്തകർക്കുള്ള (I) വിസാ ചട്ടങ്ങളിൽ ട്രംപ് ഭരണകൂടം കൂടുതൽ നിയന്ത്രണങ്ങൾ കൊണ്ടുവന്നു. പുതിയ നിയമപ്രകാരം, ഇതുവരെ പഠന പരിപാടി പൂർത്തിയാകുന്നതുവരെ രാജ്യത്ത് തുടരാൻ അനുവദിച്ചിരുന്ന രീതിക്ക് പകരം, ഇനി നിശ്ചിത കാലാവധിയുള്ള വിസാ സംവിധാനമാണ് നടപ്പാക്കുന്നത്. സാധാരണയായി വിദ്യാർത്ഥികൾക്കും എക്സ്ചേഞ്ച് വിസിറ്റർമാർക്കും പരമാവധി നാല് വർഷം വരെ മാത്രമേ വിസാ അനുവദിക്കൂ. അതിലധികം സമയം ആവശ്യമായാൽ പ്രത്യേക അനുമതിക്കായി അപേക്ഷിക്കേണ്ടിവരും.
കൂടാതെ, പഠനവിഷയം (Major) അല്ലെങ്കിൽ വിദ്യാഭ്യാസ സ്ഥാപനം മാറ്റുന്നതിനും കൂടുതൽ നിയന്ത്രണങ്ങൾ ഏർപ്പെടുത്തും. പഠനം പൂർത്തിയാക്കിയ ശേഷം അമേരിക്ക വിടാനുള്ള ഗ്രേസ് പീരിയഡും 60 ദിവസത്തിൽ നിന്ന് 30 ദിവസമായി കുറയ്ക്കും. ഇതിലൂടെ വിസാ ദുരുപയോഗം തടയുകയും കുടിയേറ്റ നിയന്ത്രണങ്ങൾ ശക്തമാക്കുകയും ചെയ്യുകയാണെന്നാണ് യു.എസ്. ആഭ്യന്തര സുരക്ഷാ വകുപ്പ് (DHS) വ്യക്തമാക്കുന്നത്.
അതേസമയം, പുതിയ നിയമം അന്തർദേശീയ വിദ്യാർത്ഥികൾക്കും അമേരിക്കൻ സർവകലാശാലകൾക്കും തിരിച്ചടിയാകുമെന്ന് വിദ്യാഭ്യാസ രംഗത്തെ വിദഗ്ധരും സർവകലാശാല അധികൃതരും ആശങ്ക പ്രകടിപ്പിച്ചു. കൂടുതൽ നിയന്ത്രണങ്ങളും ദൈർഘ്യമേറിയ പരിശോധനകളും കാരണം നിരവധി വിദ്യാർത്ഥികൾ മറ്റ് രാജ്യങ്ങളെ പഠനത്തിനായി തിരഞ്ഞെടുക്കാൻ സാധ്യതയുണ്ടെന്നും അവർ ചൂണ്ടിക്കാട്ടുന്നു.