അമേരിക്കൻ പ്രസിഡന്റ് ഡൊണാൾഡ് ട്രംപിനെ വധിക്കാൻ ഗൂഢാലോചന നടത്തിയെന്ന് ആരോപിച്ച് അറസ്റ്റിലായ പ്രതിയുടെ ജയിൽവാസം സംബന്ധിച്ചുള്ള നിയമപോരാട്ടം മുറുകുന്നു. പ്രതിയെ ജയിലിൽ ആത്മഹത്യാ നിരീക്ഷണത്തിൽ പാർപ്പിച്ചിരിക്കുന്നത് ഒഴിവാക്കണമെന്ന് ആവശ്യപ്പെട്ട് പ്രതിയുടെ അഭിഭാഷകർ ശനിയാഴ്ച വാഷിംഗ്ടൺ കോടതിയിൽ ഹർജി നൽകി. നിലവിലെ നിയന്ത്രണങ്ങൾ അങ്ങേയറ്റം കഠിനമാണെന്നും ഇത് പ്രതിയുടെ മൗലികാവകാശങ്ങളുടെ ലംഘനമാണെന്നും ഹർജിയിൽ പറയുന്നു.
ഏപ്രിൽ 25ന് വാഷിംഗ്ടണിലെ ഹിൽട്ടൺ ഹോട്ടലിൽ നടന്ന വൈറ്റ് ഹൗസ് കറസ്പോണ്ടന്റ്‌സ് ഡിന്നറിനിടെ സുരക്ഷ ലംഘിക്കാൻ ശ്രമിച്ചതിനും വെടിയുതിർത്തതിനുമാണ് കോൾ തോമസ് അലൻ എന്ന പ്രതിക്കെതിരെ കേസെടുത്തത്. അമേരിക്കൻ രാഷ്ട്രീയക്കാർക്കും മാധ്യമങ്ങൾക്കും ഏറെ പ്രാധാന്യമുള്ള ഈ ചടങ്ങിൽ ഇന്ത്യയിൽ നിന്നടക്കമുള്ള പ്രമുഖ നേതാക്കളും മാധ്യമപ്രവർത്തകരും പങ്കെടുത്തിരുന്നു. ഏപ്രിൽ 27-നാണ് ഇയാളെ അറസ്റ്റ് ചെയ്ത് ജയിലിലടച്ചത്.
പ്രതിയെ തുടക്കത്തിൽ 24 മണിക്കൂർ കർശനമായ നിരീക്ഷണത്തിൽ സുരക്ഷിതമായ ഒരു സെല്ലിലായിരുന്നു പാർപ്പിച്ചിരുന്നതെന്ന് അഭിഭാഷകർ കോടതിയിൽ പറഞ്ഞു. ഈ സമയത്ത്, അദ്ദേഹത്തിന്റെ ശരീര ചലനങ്ങളെ നിയന്ത്രിക്കുന്ന പ്രത്യേക ജാക്കറ്റ് ധരിക്കാൻ നിർബന്ധിച്ചു. പിന്നീട് ആത്മഹത്യാ ഭീഷണിയുണ്ടെന്ന കാരണം പറഞ്ഞ് ആത്മഹത്യാ പ്രതിരോധ സെല്ലിലേക്ക് മാറ്റി. ഇവിടെ അഭിഭാഷകരെ അല്ലാതെ കുടുംബാംഗങ്ങളെയോ മറ്റുള്ളവരെയോ ഫോൺ വിളിക്കാനോ കാണാനോ അനുവാദമുണ്ടായിരുന്നില്ല.