വാഷിംഗ്ടൺ: ഇറാനെതിരായ സൈനിക നടപടികൾക്കിടെ യുഎസ് ആർമി ചീഫ് ഓഫ് സ്റ്റാഫ് ജനറൽ റാണ്ടി ജോർജ് ഉൾപ്പെടെ മൂന്ന് ഉന്നത സൈനിക ഉദ്യോഗസ്ഥരെ പ്രതിരോധ സെക്രട്ടറി പീറ്റ് ഹെഗ്‌സെത്ത് സ്ഥാനത്തുനിന്ന് നീക്കി. വ്യാഴാഴ്ച പുറപ്പെടുവിച്ച ഉത്തരവിൽ ജനറൽ റാണ്ടി ജോർജിന് പുറമെ ജനറൽ ഡേവിഡ് ഹോഡ്‌നെ, മേജർ ജനറൽ വില്യം ഗ്രീൻ എന്നിവരെയാണ് പെന്റഗൺ പുറത്താക്കിയത്. സ്ഥാനചലനത്തിന് വ്യക്തമായ കാരണങ്ങൾ അധികൃതർ വെളിപ്പെടുത്തിയിട്ടില്ലെങ്കിലും, ട്രംപ് ഭരണകൂടത്തിന് കീഴിൽ സൈനിക നേതൃത്വത്തിൽ നടപ്പിലാക്കുന്ന വിപുലമായ പുനഃസംഘടനയുടെ ഭാഗമായാണ് ഈ നടപടി. ഒക്ടോബറിൽ വൈസ് ചീഫ് ഓഫ് സ്റ്റാഫായി നിയമിതനായ ജനറൽ ലാനെവ് താൽക്കാലിക ആർമി ചീഫ് ഓഫ് സ്റ്റാഫായി ചുമതലയേൽക്കുമെന്ന് പെന്റഗൺ വക്താവ് അറിയിച്ചു.

2023 ഓഗസ്റ്റ് മുതൽ ആർമി ചീഫ് ഓഫ് സ്റ്റാഫ് പദവി വഹിച്ചിരുന്ന ജനറൽ റാണ്ടി ജോർജിന്റെ പുറത്താക്കൽ സൈനിക വൃത്തങ്ങളിൽ വലിയ ചർച്ചയായിട്ടുണ്ട്. പീറ്റ് ഹെഗ്‌സെത്ത് പ്രതിരോധ സെക്രട്ടറിയായി ചുമതലയേറ്റ ശേഷം ഒരു ഡസനിലധികം ഉന്നത ജനറൽമാരെയും അഡ്മിറൽമാരെയും ഇതിനകം സർവീസിൽ നിന്ന് നീക്കം ചെയ്തിട്ടുണ്ട്. പുറത്താക്കപ്പെട്ടവരിൽ ട്രാൻസ്ഫോർമേഷൻ ആൻഡ് ട്രെയിനിംഗ് കമാൻഡ് തലവൻ ഹോഡ്‌നെയും ആർമി ചാപ്ലിൻമാരുടെ മേധാവി വില്യം ഗ്രീനും ഉൾപ്പെടുന്നു. ചാപ്ലിൻമാർ മാനസികാരോഗ്യ ചികിത്സയേക്കാൾ മതപരമായ കാര്യങ്ങളിൽ ശ്രദ്ധ കേന്ദ്രീകരിക്കണമെന്നും യൂണിഫോമിൽ റാങ്ക് ധരിക്കേണ്ടതില്ലെന്നും ഹെഗ്‌സെത്ത് കഴിഞ്ഞ ദിവസം ഉത്തരവിട്ടിരുന്നു.

ഇറാനെതിരായ യുഎസ്-ഇസ്രായേൽ ആക്രമണം അഞ്ച് ആഴ്ച പിന്നിടുമ്പോഴാണ് നിർണ്ണായകമായ ഈ നേതൃമാറ്റം നടക്കുന്നത്. യുദ്ധം അവസാനിക്കുന്നതിനെക്കുറിച്ച് വ്യക്തമായ സമയപരിധി നൽകാൻ പ്രസിഡന്റ് ഡൊണാൾഡ് ട്രംപ് തയ്യാറായിട്ടില്ലെങ്കിലും വരും ആഴ്ചകളിൽ ആക്രമണം കടുപ്പിക്കുമെന്ന് അദ്ദേഹം മുന്നറിയിപ്പ് നൽകിയിട്ടുണ്ട്. ആയിരക്കണക്കിന് അമേരിക്കൻ പാരാട്രൂപ്പർമാരെയും മറൈൻ സൈനികരെയും മിഡിൽ ഈസ്റ്റിലേക്ക് വിന്യസിക്കുന്ന ഘട്ടത്തിൽ സൈനിക തലപ്പത്തുണ്ടായ ഈ മാറ്റങ്ങൾ വരും ദിവസങ്ങളിലെ യുദ്ധതന്ത്രങ്ങളെ എങ്ങനെ ബാധിക്കുമെന്ന് പ്രതിരോധ നിരീക്ഷകർ ഉറ്റുനോക്കുന്നു. ഇറാനെ ‘ശിലായുഗത്തിലേക്ക്’ തിരികെ എത്തിക്കുമെന്ന ട്രംപിന്റെ പ്രസ്താവനയ്ക്കെതിരെ അന്താരാഷ്ട്ര തലത്തിൽ പ്രതിഷേധം ഉയരുന്നുണ്ട്.