ഉദയ്പുർ: നീണ്ടനാളത്തെ അഭ്യൂഹങ്ങൾക്കും കാത്തിരിപ്പിനുമൊടുവിൽ തെന്നിന്ത്യൻ സിനിമാലോകത്തെ പ്രിയജോഡികളായ വിജയ് ദേവരകൊണ്ടയും രശ്മിക മന്ദാനയും വിവാഹിതരായി. രാജസ്ഥാനിലെ ഉദയ്പുരിലുള്ള പഞ്ചനക്ഷത്ര റിസോർട്ടിൽ വെച്ചായിരുന്നു വിവാഹ ചടങ്ങുകൾ നടന്നത്. ആന്ധ്രയുടെ പരമ്പരാഗത ആചാരപ്രകാരം നടന്ന ചടങ്ങുകളിൽ അടുത്ത ബന്ധുക്കളും സുഹൃത്തുക്കളും പങ്കെടുത്തു.

പ്രിയ സുഹൃത്ത് ഇനി ജീവിതസഖി

തന്റെ ഏറ്റവും പ്രിയപ്പെട്ട സുഹൃത്തിനെ ജീവിതസഖിയാക്കിയ വിവരം വൈകാരികമായ കുറിപ്പോടെയാണ് വിജയ് സോഷ്യൽ മീഡിയയിൽ പങ്കുവെച്ചത്.

“ഒരു ദിവസം ഞാൻ അവളെ മിസ് ചെയ്തു. അവൾ അരികിലുണ്ടായിരുന്നെങ്കിൽ ആ ദിവസം കൂടുതൽ മനോഹരമായേനെ എന്ന് എനിക്ക് തോന്നി. ഭക്ഷണം കഴിക്കുമ്പോഴും വർക്കൗട്ട് ചെയ്യുമ്പോഴും അവളുടെ സാമീപ്യം അത് കൂടുതൽ സന്തോഷകരമാക്കുന്നു. ഞാൻ എവിടെയാണെങ്കിലും ആ സ്ഥലം ഒരു വീട് പോലെ തോന്നാൻ അവൾ കൂടെ വേണമെന്ന് എനിക്ക് തോന്നി,” വിജയ് കുറിച്ചു.

‘യഥാർഥ സ്‌നേഹം പഠിപ്പിച്ചയാൾ’

തന്റെ ഭർത്താവായ വിജയ് ദേവരകൊണ്ടയെ പരിചയപ്പെടുത്തിക്കൊണ്ടാണ് രശ്മിക ചിത്രങ്ങൾ പങ്കുവെച്ചത്. യഥാർഥ സ്‌നേഹവും സമാധാനവും എന്താണെന്ന് തനിക്ക് മനസ്സിലാക്കിത്തന്നത് വിജയ് ആണെന്നും ഇന്നത്തെ ഈ വ്യക്തിയായി തന്നെ മാറ്റിയത് അദ്ദേഹമാണെന്നും രശ്മിക കുറിച്ചു.

മൂന്ന് ദിവസം നീണ്ട ആഘോഷങ്ങൾ

ഹൽദി, സംഗീത് ചടങ്ങുകളോടെ മൂന്ന് ദിവസം നീണ്ടുനിന്ന ഗംഭീരമായ വിവാഹാഘോഷമാണ് ഉദയ്പുരിൽ നടന്നത്. കഴിഞ്ഞ ഒക്ടോബറിൽ ഹൈദരാബാദിൽ വെച്ചായിരുന്നു ഇവരുടെ വിവാഹനിശ്ചയം നടന്നത്.

സോഷ്യൽ മീഡിയയിൽ പങ്കുവെച്ച ഇവരുടെ വിവാഹച്ചിത്രങ്ങൾ ഇതിനോടകം തന്നെ ആരാധകർ ഏറ്റെടുത്തുകഴിഞ്ഞു.