ലോകത്തിലെ ഏറ്റവും വലിയ സംഗീത മത്സരങ്ങളിലൊന്നായ യൂറോവിഷൻ സോംഗ് കോൺടെസ്റ്റിൽ 2027 മുതൽ കാനഡ ഔദ്യോഗികമായി പങ്കെടുക്കുമെന്ന് യൂറോപ്യൻ ബ്രോഡ്കാസ്റ്റിംഗ് യൂണിയൻ (EBU)യും CBC/Radio-Canadaയും സംയുക്തമായി പ്രഖ്യാപിച്ചു. 2015-ൽ ഓസ്ട്രേലിയ ചേർന്നതിന് ശേഷം യൂറോവിഷനിൽ പങ്കെടുക്കുന്ന ആദ്യ പുതിയ രാജ്യമെന്ന നേട്ടവും ഇതോടെ കാനഡയ്ക്ക് സ്വന്തമാകും.
കാനഡയുടെ ദേശീയ പൊതുപ്രക്ഷേപണ സ്ഥാപനമായ CBC/Radio-Canada അടുത്തിടെ EBU-യുടെ പൂർണ അംഗത്വം നേടിയതോടെയാണ് മത്സരത്തിൽ പങ്കെടുക്കാനുള്ള അർഹത ലഭിച്ചത്. 2027-ലെ യൂറോവിഷൻ മത്സരത്തിൽ കാനഡ സെമിഫൈനൽ ഘട്ടം മുതൽ മത്സരിക്കും. രാജ്യത്തെ പ്രതിനിധിയെയും ഗാനത്തെയും എങ്ങനെ തിരഞ്ഞെടുക്കുമെന്നതിനെക്കുറിച്ചുള്ള വിശദാംശങ്ങൾ ഈ വർഷാവസാനത്തോടെ പ്രഖ്യാപിക്കുമെന്ന് CBC അറിയിച്ചു.
യൂറോവിഷന് കാനഡയിൽ വർഷങ്ങളായി വലിയ ആരാധകവൃന്ദമുണ്ട്. ലോകമെമ്പാടുമുള്ള പ്രേക്ഷകർക്ക് വോട്ടുചെയ്യാൻ അവസരം നൽകിയിരുന്ന “Rest of the World” വോട്ടിംഗിൽ കാനഡ മുൻനിര രാജ്യങ്ങളിലൊന്നായിരുന്നു. യൂറോപ്പിന് പുറത്തുനിന്ന് ഏറ്റവും കൂടുതൽ ടിക്കറ്റുകൾ വാങ്ങുന്ന രാജ്യങ്ങളിലൊന്നും കാനഡയാണ്. 2027-ലെ മത്സരം ബൾഗേറിയിൽ നടക്കും.
1988-ൽ കനേഡിയൻ ഗായിക സെലിൻ ഡിയോൺ സ്വിറ്റ്സർലൻഡിനെ പ്രതിനിധീകരിച്ച് യൂറോവിഷൻ കിരീടം നേടിയിരുന്നെങ്കിലും, ഒരു രാജ്യമെന്ന നിലയിൽ കാനഡ ഇതാദ്യമായാണ് മത്സരത്തിൽ ഔദ്യോഗികമായി പങ്കെടുക്കുന്നത്. ഇതിലൂടെ കനേഡിയൻ സംഗീത പ്രതിഭകൾക്ക് ആഗോള വേദിയിൽ തങ്ങളുടെ കഴിവ് പ്രകടിപ്പിക്കാനുള്ള മികച്ച അവസരം ലഭിക്കുമെന്നാണ് വിലയിരുത്തപ്പെടുന്നത്.
കാനഡയുടെ പ്രവേശനം യൂറോവിഷന്റെ ആഗോള സ്വീകാര്യത കൂടുതൽ വിപുലമാക്കുന്ന സുപ്രധാന ചുവടുവെപ്പായാണ് സംഗീതലോകം വിലയിരുത്തുന്നത്. രാജ്യത്തിന്റെ സാംസ്കാരിക വൈവിധ്യവും സംഗീത പൈതൃകവും ലോകവേദിയിൽ അവതരിപ്പിക്കാൻ ഈ പങ്കാളിത്തം സഹായിക്കുമെന്നും, യൂറോപ്പിന് പുറത്തുള്ള പ്രേക്ഷകരിലേക്കും യൂറോവിഷന്റെ ജനപ്രീതി കൂടുതൽ വ്യാപിപ്പിക്കുമെന്നുമാണ് സംഘാടകരുടെ പ്രതീക്ഷ.