കാനഡയിലെയും അമേരിക്കയിലെയും ശുദ്ധജല തടാകങ്ങളിൽ ജീവിക്കുന്ന ബ്രൗൺ ബുൾഹെഡ് കാറ്റ്ഫിഷ് ഇനത്തിൽ അപൂർവമായ പകർച്ച ചർമാർബുദം (Transmissible Skin Cancer) കണ്ടെത്തിയതായി ശാസ്ത്രജ്ഞർ അറിയിച്ചു. ഒരു മത്സ്യത്തിൽ നിന്ന് മറ്റൊന്നിലേക്ക് കാൻസർ കോശങ്ങൾ നേരിട്ട് പകരുന്ന സ്വഭാവമുള്ള ഈ രോഗം ശുദ്ധജല ജീവികളിൽ ആദ്യമായും, ലോകത്ത് ഇതുവരെ രേഖപ്പെടുത്തിയിട്ടുള്ള നാലാമത്തെ സ്വാഭാവിക പകർച്ചാർബുദമായുംവിലയിരുത്തപ്പെടുന്നു.
അമേരിക്കയിലെ വെർമോണ്ടും കാനഡയിലെ ക്യൂബെക്കും തമ്മിലുള്ള അതിർത്തിയിലുള്ള ലേക്ക് മെംഫ്രെമഗോഗ്തടാകത്തിൽ 2012 മുതൽ കറുത്ത പാടുകളും മുഴകളും ഉള്ള മത്സ്യങ്ങളെ കണ്ടെത്തിയിരുന്നു. പിന്നീട് നടത്തിയ ജനിതക പരിശോധനകളിൽ ഈ മുഴകൾ സാധാരണ ട്യൂമറുകളല്ലെന്നും, കാൻസർ കോശങ്ങൾ തന്നെ ഒരു മത്സ്യത്തിൽ നിന്ന് മറ്റൊന്നിലേക്ക് പകരുന്നതാണെന്നും ഗവേഷകർ സ്ഥിരീകരിച്ചു.
ഗവേഷണ സംഘം പിന്നീട് ന്യൂ ഇംഗ്ലണ്ടിലെയും കാനഡയിലെയും മറ്റ് തടാകങ്ങളിലും സമാന രോഗബാധ കണ്ടെത്തി. ഈ കാൻസർ എവിടെ നിന്നാണ് ആരംഭിച്ചതെന്നും മത്സ്യങ്ങൾക്കിടയിൽ എങ്ങനെ വ്യാപിക്കുന്നുവെന്നും കണ്ടെത്താൻ കൂടുതൽ പഠനങ്ങൾ തുടരുകയാണ്. ഈ കണ്ടെത്തൽ പ്രശസ്ത ശാസ്ത്ര ജേർണലായ Nature-ലാണ് പ്രസിദ്ധീകരിച്ചിരിക്കുന്നത്.
അതേസമയം, ഈ രോഗം മനുഷ്യരിലേക്ക് പകരുമെന്നോ കുടിവെള്ളത്തിനോ മനുഷ്യാരോഗ്യത്തിനോ നിലവിൽ ഭീഷണിയാണെന്നോ തെളിവുകളില്ലെന്ന് ഗവേഷകർ വ്യക്തമാക്കി. എന്നാൽ കാൻസർ എങ്ങനെ വ്യാപിക്കുന്നു എന്നതിനെക്കുറിച്ചുള്ള ശാസ്ത്രീയ അറിവ് വികസിപ്പിക്കുന്നതിൽ ഈ കണ്ടെത്തൽ നിർണായക മുന്നേറ്റമാകുമെന്നാണ് വിദഗ്ധരുടെ വിലയിരുത്തൽ.