വർഷങ്ങളായി കോടതികളിൽ തുടരുന്ന ബേബി പൗഡർ കാൻസർ കേസുകൾ അവസാനിപ്പിക്കാൻ ലക്ഷ്യമിട്ട് ആഗോള ആരോഗ്യ ഉൽപ്പന്ന നിർമാതാക്കളായ Johnson & Johnson (J&J) 5.5 ബില്യൺ അമേരിക്കൻ ഡോളറിന്റെ വമ്പൻ ഒത്തുതീർപ്പ് നിർദ്ദേശം മുന്നോട്ടുവച്ചു. ടാൽക്ക് (Talc) അധിഷ്ഠിത ബേബി പൗഡർ ഉപയോഗിച്ചതിനെ തുടർന്ന് പ്രധാനമായും അണ്ഡാശയ കാൻസർ (Ovarian Cancer) ബാധിച്ചെന്നാരോപിച്ച് നൽകിയ പതിനായിരക്കണക്കിന് കേസുകളാണ് ഈ നിർദ്ദേശത്തിന്റെ പരിധിയിൽ ഉൾപ്പെടുന്നത്.
കമ്പനിയുടെ കണക്കുകൾ പ്രകാരം ഏകദേശം 76,000-ത്തിലധികം കേസുകൾ ഈ ഒത്തുതീർപ്പിലൂടെ പരിഹരിക്കാനാണ് ശ്രമിക്കുന്നത്. എന്നാൽ ഇത് പ്രാബല്യത്തിൽ വരാൻ, കേസുകളിലെ 95 ശതമാനം പരാതിക്കാരുടെയും സമ്മതംലഭിക്കേണ്ടതുണ്ട്. പരാതിക്കാരുടെ അംഗീകാരം ലഭിച്ചാൽ അടുത്ത വർഷം മുതൽ നഷ്ടപരിഹാര തുക വിതരണം ആരംഭിക്കാനാണ് കമ്പനി ലക്ഷ്യമിടുന്നത്.
ടാൽക്ക് അടങ്ങിയ ബേബി പൗഡറിൽ ആസ്‌ബെസ്റ്റോസ് (Asbestos) മലിനീകരണം ഉണ്ടായിരുന്നുവെന്നും, അത് വർഷങ്ങളോളം ഉപയോഗിച്ചതാണ് കാൻസറിന് കാരണമായതെന്നുമാണ് ആയിരക്കണക്കിന് സ്ത്രീകളും അവരുടെ കുടുംബങ്ങളും ആരോപിക്കുന്നത്. എന്നാൽ Johnson & Johnson ഈ ആരോപണങ്ങൾ തുടക്കം മുതൽ നിഷേധിച്ചുവരികയാണ്. ശാസ്ത്രീയ പഠനങ്ങൾ തങ്ങളുടെ ഉൽപ്പന്നങ്ങൾ കാൻസറിന് കാരണമാണെന്ന് തെളിയിച്ചിട്ടില്ലെന്നും, ഉപഭോക്തൃ സുരക്ഷയ്ക്ക് എപ്പോഴും മുൻഗണന നൽകിയിട്ടുണ്ടെന്നും കമ്പനി ആവർത്തിച്ചു വ്യക്തമാക്കി.
ഇതിന് മുമ്പ് ദിവാല (Bankruptcy) നിയമം ഉപയോഗിച്ച് കേസുകൾ അവസാനിപ്പിക്കാനുള്ള കമ്പനിയുടെ ശ്രമങ്ങൾ അമേരിക്കൻ കോടതികൾ പലതവണ തള്ളിയിരുന്നു. തുടർന്ന് പരാതിക്കാരുമായി നേരിട്ടുള്ള ഒത്തുതീർപ്പിലേക്ക് നീങ്ങാനാണ് കമ്പനി തീരുമാനിച്ചത്. നിലവിലെ നിർദ്ദേശം അംഗീകരിക്കപ്പെട്ടാൽ, അമേരിക്കയിലെ ഏറ്റവും വലിയ ഉൽപ്പന്ന-ബാധ്യത (Product Liability) ഒത്തുതീർപ്പുകളിൽ ഒന്നായിരിക്കും ഇത്.
2020-ൽ അമേരിക്കയിലും കാനഡയിലും ടാൽക്ക് അധിഷ്ഠിത ബേബി പൗഡറിന്റെ വിൽപ്പന Johnson & Johnsonഅവസാനിപ്പിച്ചിരുന്നു. പിന്നീട് ലോകമെമ്പാടും ടാൽക്ക് പൗഡറിന് പകരം കോൺസ്റ്റാർച്ച് (Cornstarch) അധിഷ്ഠിത ബേബി പൗഡറാണ് കമ്പനി വിപണിയിലെത്തിച്ചത്. എന്നിരുന്നാലും, ഈ ഒത്തുതീർപ്പ് കുറ്റസമ്മതമല്ലെന്നും, വർഷങ്ങളായി നീണ്ടുനിൽക്കുന്ന നിയമപോരാട്ടങ്ങൾക്ക് വിരാമമിടാനും എല്ലാ കക്ഷികൾക്കും വ്യക്തത നൽകാനുമുള്ള നടപടിയാണിതെന്നും കമ്പനി വ്യക്തമാക്കി.