കാനഡ–അമേരിക്ക–മെക്സിക്കോ സ്വതന്ത്ര വ്യാപാര കരാറായ CUSMA (Canada–United States–Mexico Agreement) നിലവിലെ രൂപത്തിൽ പുതുക്കാൻ അമേരിക്ക തയ്യാറാകാത്തതോടെ വടക്കേ അമേരിക്കൻ വ്യാപാര മേഖലയിലാകെ അനിശ്ചിതത്വം ശക്തമായി. കരാർ ഉടൻ അവസാനിക്കുന്നില്ലെങ്കിലും, ഇനി മുതൽ ഇത് വാർഷിക അവലോകനങ്ങൾക്ക് വിധേയമാകുകയും ഭാവിയെക്കുറിച്ചുള്ള ചർച്ചകൾ തുടരുമെന്നും അമേരിക്ക അറിയിച്ചു.
അമേരിക്കൻ വ്യാപാര പ്രതിനിധി ജാമിസൺ ഗ്രീർ പറയുന്നതനുസരിച്ച്, നിലവിലെ കരാറിലെ ചില വ്യവസ്ഥകൾ പുനഃപരിശോധിക്കേണ്ടതുണ്ടെന്നാണ് വാഷിങ്ടണിന്റെ നിലപാട്. പ്രത്യേകിച്ച് വാഹന നിർമാണം, ഉൽപ്പന്നങ്ങളുടെ ഉത്ഭവ മാനദണ്ഡങ്ങൾ (Rules of Origin), വ്യാപാര അസന്തുലിതാവസ്ഥ, ചൈനയുമായി ബന്ധപ്പെട്ട വ്യാപാര ആശങ്കകൾ എന്നിവയിൽ കൂടുതൽ മാറ്റങ്ങൾ വേണമെന്നാണ് അമേരിക്ക ആവശ്യപ്പെടുന്നത്.
അതേസമയം, കാനഡ സർക്കാർ CUSMA നിലനിർത്തുന്നതിനും ആവശ്യമായ പരിഷ്കാരങ്ങളിലൂടെ കരാർ മുന്നോട്ടുകൊണ്ടുപോകുന്നതിനും പ്രതിബദ്ധമാണെന്ന് അറിയിച്ചു. കാനഡ–അമേരിക്ക–മെക്സിക്കോ രാജ്യങ്ങൾ തമ്മിലുള്ള വ്യാപാരവും വിതരണ ശൃംഖലയും സംരക്ഷിക്കുന്നതിനായി ചർച്ചകൾ തുടരുമെന്ന് കാനഡൻ അധികൃതർ വ്യക്തമാക്കി.
വ്യാപാര വിദഗ്ധരുടെ അഭിപ്രായത്തിൽ, കരാർ ഉടൻ റദ്ദാകില്ലെങ്കിലും ദീർഘകാല അനിശ്ചിതത്വം നിക്ഷേപ തീരുമാനങ്ങളെയും വ്യവസായ വികസനത്തെയും ബാധിച്ചേക്കാം. പ്രത്യേകിച്ച് വാഹന നിർമാണം, കാർഷികം, സ്റ്റീൽ, അലുമിനിയം, നിർമ്മാണ മേഖലകൾ എന്നിവയിൽ പ്രവർത്തിക്കുന്ന കമ്പനികൾക്ക് പുതിയ വ്യാപാര നയങ്ങൾ കാത്തിരിക്കേണ്ട സാഹചര്യമാണുള്ളത്.
2020-ൽ NAFTAയ്ക്ക് പകരമായി നിലവിൽ വന്ന CUSMA കാനഡ, അമേരിക്ക, മെക്സിക്കോ എന്നീ രാജ്യങ്ങൾ തമ്മിലുള്ള ലോകത്തിലെ ഏറ്റവും വലിയ സ്വതന്ത്ര വ്യാപാര മേഖലകളിലൊന്നാണ്. നിലവിലെ അവലോകന പ്രക്രിയയുടെ ഫലമാണ് കരാറിന്റെ ദീർഘകാല ഭാവി നിർണയിക്കുക. അടുത്ത മാസങ്ങളിലെ ചർച്ചകൾ വടക്കേ അമേരിക്കൻ വ്യാപാര ബന്ധത്തിന്റെ ദിശ നിർണയിക്കുന്നതിൽ നിർണായകമാകുമെന്നാണ് സാമ്പത്തിക വിദഗ്ധരുടെ വിലയിരുത്തൽ.