അമേരിക്കയിലേക്കുള്ള കനേഡിയൻ യാത്രകളുടെ എണ്ണം തുടർച്ചയായി മൂന്നാം മാസവും വർധിച്ചതായി സ്റ്റാറ്റിസ്റ്റിക്സ് കാനഡയുടെ ഏറ്റവും പുതിയ കണക്കുകൾ വ്യക്തമാക്കുന്നു. കഴിഞ്ഞ വർഷം തുടർച്ചയായി 15 മാസം വാർഷിക അടിസ്ഥാനത്തിൽ ഇടിവ് രേഖപ്പെടുത്തിയതിന് ശേഷമാണ് അതിർത്തി കടന്നുള്ള യാത്രകളിൽ വീണ്ടും വളർച്ചയുടെ സൂചനകൾ പ്രകടമാകുന്നത്. വേനൽക്കാല അവധിയും യാത്രാ ആവശ്യകതയിലെ വർധനയും ഈ തിരിച്ചുവരവിന് പ്രധാന കാരണങ്ങളായാണ് വിലയിരുത്തപ്പെടുന്നത്.
ജൂൺ മാസത്തിൽ ഏകദേശം 23 ലക്ഷം കനേഡിയൻ യാത്രക്കാരാണ് അമേരിക്കയിൽ നിന്ന് മടങ്ങിയെത്തിയത്. റോഡ് മാർഗമുള്ള യാത്രകളിലാണ് ഏറ്റവും വലിയ വർധന രേഖപ്പെടുത്തിയത്. വാഹനമാർഗം മടങ്ങിയെത്തിയവരുടെ എണ്ണം മുൻവർഷത്തെ അപേക്ഷിച്ച് 7.6 ശതമാനം ഉയർന്ന് 17 ലക്ഷം ആയി. ഇവരിൽ ഭൂരിഭാഗവും ഷോപ്പിങ്, വിനോദയാത്ര, കുടുംബസന്ദർശനം എന്നിവയ്ക്കായി അതിർത്തി കടന്ന ഒരേ ദിവസം തന്നെ മടങ്ങിയെത്തിയവരായിരുന്നു.
അതേസമയം, വിമാന മാർഗമുള്ള യാത്രകളിൽ നേരിയ ഇടിവ് രേഖപ്പെടുത്തി. വിമാനത്തിൽ അമേരിക്കയിൽ നിന്ന് മടങ്ങിയെത്തിയ കനേഡിയൻ യാത്രക്കാരുടെ എണ്ണം 1.2 ശതമാനം കുറഞ്ഞ് 5.46 ലക്ഷം ആയി. മറുവശത്ത്, ക്രൂയിസ് കപ്പൽ യാത്രകളിൽ ശ്രദ്ധേയമായ വർധനയാണ് ഉണ്ടായത്. വേനൽക്കാല അവധിയുമായി ബന്ധപ്പെട്ട വിനോദസഞ്ചാര ആവശ്യകതയാണ് ഇതിന് കാരണമായതെന്നാണ് വിലയിരുത്തൽ.
തുടർച്ചയായ മൂന്നാം മാസവും വളർച്ച രേഖപ്പെടുത്തിയെങ്കിലും, 2024 ജൂണുമായി താരതമ്യം ചെയ്യുമ്പോൾ അമേരിക്കയിലേക്കുള്ള കനേഡിയൻ യാത്രകൾ ഇപ്പോഴും 24.6 ശതമാനം കുറവാണ്. സമീപകാല വ്യാപാര തർക്കങ്ങൾ, കറൻസി വിനിമയ നിരക്കിലെ വ്യത്യാസം, യാത്രാച്ചെലവിലെ വർധന, മറ്റ് രാജ്യങ്ങളിലേക്കുള്ള വിനോദസഞ്ചാര താൽപര്യം എന്നിവ ഈ കുറവിന് പ്രധാന കാരണങ്ങളായി വിദഗ്ധർ ചൂണ്ടിക്കാട്ടുന്നു.
അതേസമയം, അമേരിക്കയിൽ നിന്ന് കാനഡയിലേക്കുള്ള യാത്രകളിലും വളർച്ച രേഖപ്പെടുത്തി. ജൂൺ മാസത്തിൽ ഏകദേശം 30 ലക്ഷം അമേരിക്കൻ സന്ദർശകർ കാനഡയിലെത്തി. ഇത് മുൻവർഷത്തെ അപേക്ഷിച്ച് 6.1 ശതമാനംകൂടുതലാണ്. റോഡ് മാർഗമുള്ള യാത്രകളും ക്രൂയിസ് കപ്പൽ വഴിയെത്തിയ വിനോദസഞ്ചാരികളുടെയും എണ്ണത്തിൽ ഗണ്യമായ വർധന ഉണ്ടായതായി റിപ്പോർട്ടിൽ പറയുന്നു.
അമേരിക്കയ്ക്ക് പുറമെ മറ്റ് രാജ്യങ്ങളിൽ നിന്നുള്ള സന്ദർശകരുടെ വരവും വർധിച്ചു. ജൂൺ മാസത്തിൽ 8.11 ലക്ഷംവിദേശ സന്ദർശകരാണ് കാനഡയിലെത്തിയത്. യുകെ, ഇന്ത്യ, ഫ്രാൻസ് എന്നിവയാണ് ഏറ്റവും കൂടുതൽ സന്ദർശകരെത്തിയ രാജ്യങ്ങൾ. അന്താരാഷ്ട്ര വിനോദസഞ്ചാരികളുടെ വരവ് വർധിച്ചതോടെ ഹോട്ടൽ, റസ്റ്റോറന്റ്, റീട്ടെയിൽ, ഗതാഗതം തുടങ്ങിയ മേഖലകളിലും സാമ്പത്തിക പ്രവർത്തനങ്ങൾ ശക്തിപ്പെട്ടതായി ടൂറിസം മേഖലയിലെ വിദഗ്ധർ പറയുന്നു.
വിനോദസഞ്ചാര മേഖലയിലെ ഈ തിരിച്ചുവരവ് കാനഡയുടെ സമ്പദ്‌വ്യവസ്ഥയ്ക്ക് പ്രതീക്ഷ നൽകുന്നതാണെന്ന് വിദഗ്ധർ വിലയിരുത്തുന്നു. അതിർത്തി കടന്നുള്ള യാത്രകളിലെ തുടർച്ചയായ വർധന കാനഡ–അമേരിക്ക സാമ്പത്തിക ബന്ധത്തിനും ടൂറിസം മേഖലയ്ക്കും ഗുണകരമാകുമെന്നാണ് പ്രതീക്ഷ. എന്നിരുന്നാലും, കോവിഡ് മഹാമാരിക്ക് മുമ്പുണ്ടായിരുന്ന യാത്രാ നിലവാരത്തിലെത്താൻ ഇനിയും സമയം വേണ്ടിവരുമെന്നും അവർ ചൂണ്ടിക്കാട്ടുന്നു.