2026-ലെ കാൻ ഫിലിം ഫെസ്റ്റിവലിന്റെ സമാപന ചടങ്ങിൽ ശ്രദ്ധാകേന്ദ്രമായി ഐശ്വര്യ റായ് ബച്ചൻ. തികച്ചും പരീക്ഷണാത്മകമായ ഒരു വസ്ത്രമണിഞ്ഞ് റെഡ് കാർപെറ്റിലെത്തിയ നടി എല്ലാവരുടെയും പ്രശംസ പിടിച്ചുപറ്റി. കാനിലെ തന്റെ പതിവ് ആഡംബര ശൈലി നിലനിർത്തിക്കൊണ്ട്, തൂവലുകളും ലേസുകളും പിടിപ്പിച്ച വെള്ള പാന്റ്‌സൂട്ട് ധരിച്ച് തികച്ചും ബോൾഡായ ഒരു ഫാഷൻ സ്റ്റേറ്റ്‌മെന്റാണ് താരം നടത്തിയത്.
രത്നങ്ങൾ പതിപ്പിച്ച ലാപെലുകളുള്ള ബ്ലേസറും അതിനൊപ്പം നാടകീയത ഉണർത്തുന്ന വലിയൊരു തൂവൽ ബോവയും ചേർന്നതായിരുന്നു ഈ വസ്ത്രം. ഇതിനൊപ്പം അലങ്കാരപ്പണികൾ ചെയ്ത പാന്റും അതിമനോഹരമായ ലേസ് ലെയറുകളും ഐശ്വര്യ അണിഞ്ഞിരുന്നു. ചൈനീസ് ഡിസൈനർ ചെനി ചാൻ ആണ് ഈ വസ്ത്രം നടിക്കായി രൂപകൽപ്പന ചെയ്തത്.
ന്യൂഡ് ലിപ്സ്റ്റിക്, ഭംഗിയായി എഴുതിയ പുരികങ്ങൾ, കാർമേഘം പോലെയുള്ള കണ്ണുകൾ എന്നിവയോടെ ലളിതമായ മേക്കപ്പാണ് താരം തിരഞ്ഞെടുത്തത്. മുടി സാധാരണ കാണാറുള്ള നേരെ വകഞ്ഞ ഒതുക്കിവെച്ച ശൈലിക്ക് പകരം, വോളിയം കൂടിയ അൽപം വന്യമായ വേവ്സ് രീതിയിൽ അഴിച്ചിട്ടിരിക്കുകയായിരുന്നു. ഇത് താരത്തിന് തികച്ചും ഒരു പുതുമയുള്ള ലുക്ക് നൽകി. കാനിൽ സാധാരണായായി താരത്തിൽ നിന്ന് എല്ലായ്പ്പോഴും പ്രതീക്ഷിക്കുന്ന തരത്തിലുള്ള അതിമനോഹരമായ ഈ വസ്ത്രധാരണം അതിന്റെ എല്ലാ പ്രൗഢിയും വിളിച്ചോതുന്നതായിരുന്നു. ഇതിനെല്ലാം പുറമെ താരത്തിന്റെ സമാനതകളില്ലാത്ത ആത്മവിശ്വാസവും സൗന്ദര്യത്തിന്റെ തിളക്കം കൂട്ടി.
കാൻ 2026-ൽ ഐശ്വര്യയുടെ രണ്ടാമത്തെ റെഡ് കാർപെറ്റ് പ്രകടനമായിരുന്നു ഇത്. ഈ വർഷത്തെ തന്റെ ആദ്യ വരവിൽ, ഇന്ത്യൻ ഡിസൈനറായ അമിത് അഗർവാൾ രൂപകൽപ്പന ചെയ്ത തിളങ്ങുന്ന നീല നിറത്തിലുള്ള ശിൽപഭംഗിയുള്ള ഗൗൺ ധരിച്ചാണ് താരം എല്ലാവരുടെയും ശ്രദ്ധ പിടിച്ചുപറ്റിയത്. ശരീരത്തോട് ചേർന്ന് നിൽക്കുന്ന ഈ മെർമെയ്ഡ് സ്റ്റൈൽ വസ്ത്രത്തിനൊപ്പം നിലത്ത് മുട്ടി കിടക്കുന്ന ഓർഗൻസ ദുപ്പട്ടയും ധരിച്ചിരുന്നു. തിളങ്ങുന്ന വജ്രങ്ങളും നീലക്കല്ലുകളും ചേർന്ന ആഭരണങ്ങളാണ് ഈ ലുക്കിന് പൂർണത നൽകിയത്.
ഇതിന് പിന്നാലെ, കാനിൽ നടന്ന ലോറിയലിന്റെ ‘ലൈറ്റ്സ് ഓൺ വിമൻസ് വർത്ത്’ ചടങ്ങിൽ മകൾ ആരാധ്യയ്ക്കൊപ്പമാണ് ഐശ്വര്യ തിളങ്ങിയത്. അമ്മയും മകളും ഗ്ലാമറസ് ഗൗണുകളിലാണ് ചടങ്ങിനെത്തിയത്. ഐശ്വര്യ കേപ്പ് ചേർത്ത ഇളം പിങ്ക് നിറത്തിലുള്ള കോർസെറ്റ് ഗൗണിൽ തിളങ്ങിയപ്പോൾ ആരാധ്യ ചുവപ്പ് വസ്ത്രത്തിൽ അതീവ സുന്ദരിയായി കാണപ്പെട്ടു.
ഈ വർഷത്തെ കാൻ ഫിലിം ഫെസ്റ്റിവലിൽ ഐശ്വര്യ റായ് ബച്ചൻ പങ്കെടുക്കുമോ എന്നതിനെ കുറിച്ച് ഗണ്യമായ അഭ്യൂഹങ്ങൾ ഉണ്ടായിരുന്നു. ആലിയ ഭട്ട്, വയോള ഡേവിസ്, ഇവാ ലോംഗോറിയ, ഹെലൻ മിറൻ എന്നിവരുൾപ്പെടെയുള്ള അംബാസഡർമാരെ ഉൾപ്പെടുത്തിയ ലോറിയൽ പാരീസിന്റെ സമീപകാല കാൻ പ്രചാരണ ദൃശ്യങ്ങളിൽ നിന്ന് നടി അപ്രത്യക്ഷയായത് ആരാധകർ ശ്രദ്ധിച്ചതോടെയാണ് ചർച്ചകൾ കൊഴുത്തത്. എന്നാൽ, ആരാധകർ സ്നേഹത്തോടെ വിളിക്കുന്നതുപോലെ ആ ‘കാൻ റാണി’ ഒടുവിൽ എത്തിച്ചേർന്നു, അതും മാരക ലുക്കിൽ തന്നെ.