അമേരിക്കയും ഇറാനും തമ്മിലുള്ള യുദ്ധം മൂലം മിഡിൽ ഈസ്റ്റിലുണ്ടായ സംഘർഷം ലോകത്തിന് വലിയ ഭീഷണിയാകുന്നു എന്ന് ലോകബാങ്ക്. ലോകബാങ്കിന്റെ ഏറ്റവും പുതിയ റിപ്പോർട്ടിലെ മുന്നറിയിപ്പുകൾ പ്രകാരം, പശ്ചിമേഷ്യയിലെ വർദ്ധിച്ചുവരുന്ന ഭൗമരാഷ്ട്രീയ സംഘർഷങ്ങൾ ആഗോള ഊർജ്ജ വിപണിയെയും മറ്റ് ചരക്ക് വിപണികളെയും ഭയാനകമായി ബാധിച്ചേക്കാം. യുദ്ധസാഹചര്യങ്ങൾ തുടരുന്നത് ലോകമെമ്പാടും വലിയ വിലക്കയറ്റത്തിന് കാരണമാകുകയും സാമ്പത്തിക വളർച്ചാ നിരക്കിനെ മന്ദഗതിയിലാക്കുകയും ചെയ്യും.
ലോകബാങ്കിന്റെ കണക്കുകൂട്ടൽ പ്രകാരം 2026-ൽ ഊർജ്ജ വിലയിൽ 24 ശതമാനം വരെയും ചരക്ക് വിലയിൽ 16 ശതമാനം വരെയും വർദ്ധനവുണ്ടാകാൻ സാധ്യതയുണ്ട്. നിലവിൽ അന്താരാഷ്ട്ര വിപണിയിൽ ക്രൂഡ് ഓയിൽ വില ബാരലിന് 110 ഡോളറിന് മുകളിലാണ്. യുദ്ധം അവസാനിച്ചാലും ഹോർമുസ് കടലിടുക്ക് വീണ്ടും തുറന്നാലും ഇതിന്റെ പ്രത്യാഘാതങ്ങൾ ദീർഘകാലം നിലനിൽക്കും. 2025-ൽ ബാരലിന് 69 ഡോളറായിരുന്ന ബ്രെന്റ് ക്രൂഡിന്റെ ശരാശരി വില 2026-ൽ 86 ഡോളറായി തുടരാനാണ് സാധ്യത.