ജനീവ: യൂറോപ്പിൽ വിതരണത്തിനായി കൊണ്ടുപോയ 12 ടണ്ണിലധികം കിറ്റ്കാറ്റ് ചോക്ലേറ്റ് ബാറുകൾ ട്രക്ക് സഹിതം മോഷ്ടിക്കപ്പെട്ടു. സ്വിസ് ഭക്ഷ്യ ഭീമനായ നെസ്‌ലെയുടെ ഉടമസ്ഥതയിലുള്ള കിറ്റ്കാറ്റ് ശനിയാഴ്ച എഎഫ്‌പിക്ക് (AFP) നൽകിയ പ്രസ്താവനയിലാണ് 4,13,793 യൂണിറ്റ് ചോക്ലേറ്റുകൾ അടങ്ങിയ ഷിപ്പ്‌മെന്റ് കാണാതായ വിവരം സ്ഥിരീകരിച്ചത്. ഇറ്റലിയിൽ നിന്ന് പോളണ്ടിലേക്ക് പോവുകയായിരുന്ന ട്രക്ക് കഴിഞ്ഞ ആഴ്ചയാണ് അപ്രത്യക്ഷമായത്. ഈസ്റ്റർ ആഘോഷങ്ങൾക്ക് തൊട്ടുമുമ്പ് നടന്ന ഈ വൻ കവർച്ച വിപണിയിൽ കിറ്റ്കാറ്റിന്റെ ലഭ്യതയെ സാരമായി ബാധിക്കുമെന്നും ബ്രാൻഡ് വക്താക്കൾ മുന്നറിയിപ്പ് നൽകി. പ്രാദേശിക അധികാരികളുമായി ചേർന്ന് അന്വേഷണം പുരോഗമിക്കുകയാണെങ്കിലും വാഹനത്തെക്കുറിച്ചോ മോഷണം പോയ സാധനങ്ങളെക്കുറിച്ചോ നിലവിൽ വിവരമൊന്നുമില്ല.

ഉൽപ്പാദന കേന്ദ്രത്തിൽ നിന്നും വിതരണ കേന്ദ്രത്തിലേക്ക് നീങ്ങുന്നതിനിടെയാണ് ഈ വൻ മോഷണം നടന്നത്. തങ്ങളുടെ പ്രശസ്തമായ ‘ബ്രേക്ക്’ (Break) എന്ന പരസ്യവാചകത്തെ പരിഹസിച്ചുകൊണ്ട്, കള്ളന്മാർ ഈ സന്ദേശം അക്ഷരാർത്ഥത്തിൽ എടുത്തതായി നെസ്‌ലെ വക്താവ് പ്രതികരിച്ചു. മോഷണം പോയ ബാറുകൾ യൂറോപ്പിലെ അനൗദ്യോഗിക വിപണികളിലൂടെ വിറ്റഴിക്കാൻ സാധ്യതയുണ്ടെന്ന് കമ്പനി ആശങ്കപ്പെടുന്നു. വിതരണ ശൃംഖലയിലെ പങ്കാളികളുമായി സഹകരിച്ച് സാധനങ്ങൾ കണ്ടെത്താനുള്ള ശ്രമങ്ങൾ ഊർജിതമാക്കിയിട്ടുണ്ട്.

മോഷ്ടിക്കപ്പെട്ട ചോക്ലേറ്റ് ബാറുകൾ തിരിച്ചറിയുന്നതിനായി പാക്കറ്റുകളിലെ സവിശേഷമായ ബാച്ച് കോഡുകൾ (Batch Codes) സ്കാൻ ചെയ്യാൻ കമ്പനി നിർദ്ദേശിച്ചിട്ടുണ്ട്. ഇത്തരം കോഡുകൾ സ്കാൻ ചെയ്യുമ്പോൾ മോഷണം പോയ ബാച്ചാണെന്ന് കണ്ടെത്തിയാൽ അത് ഉടൻ കമ്പനിയെ അറിയിക്കാനുള്ള സംവിധാനവും ഒരുക്കിയിട്ടുണ്ട്. ഈസ്റ്റർ സീസണിൽ ഉപഭോക്താക്കൾക്ക് പ്രിയപ്പെട്ട ചോക്ലേറ്റുകൾ ലഭിക്കാൻ ബുദ്ധിമുട്ടുണ്ടാകുമെന്നതിൽ ഖേദിക്കുന്നതായും, തെളിവുകൾ ശേഖരിക്കാൻ അധികൃതരുമായി സഹകരിക്കുമെന്നും നെസ്‌ലെ അറിയിച്ചു.