അനുമതിയില്ലാത്ത പെപ്റ്റൈഡ് (Peptide) ഉൽപ്പന്നങ്ങൾ വിൽക്കുകയും വിതരണം ചെയ്യുകയും ചെയ്തതായി ആരോപിക്കപ്പെടുന്ന ഒരു ഓൺലൈൻ റീട്ടെയിലർക്കെതിരെ ഫെഡറൽ കോടതിയിൽ നിന്ന് ഇൻജങ്ഷൻ (Injunction)ഉത്തരവ് നേടിയതായി ഹെൽത്ത് കാനഡ അറിയിച്ചു. കോടതി ഉത്തരവിനെ തുടർന്ന്, ബന്ധപ്പെട്ട സ്ഥാപനത്തിന് ഇത്തരം അനുമതിയില്ലാത്ത ഉൽപ്പന്നങ്ങളുടെ വിൽപ്പനയും പരസ്യപ്രചാരണവും വിതരണം ചെയ്യുന്നതും തൽക്കാലം നിർത്തിവയ്ക്കേണ്ടിവരും.
പെപ്റ്റൈഡുകൾ ശരീരത്തിലെ വിവിധ ജൈവപ്രവർത്തനങ്ങളെ സ്വാധീനിക്കുന്ന സംയുക്തങ്ങളാണ്. ചില പെപ്റ്റൈഡുകൾക്ക് നിയമാനുസൃതമായ വൈദ്യശാസ്ത്ര ഉപയോഗങ്ങളുണ്ടെങ്കിലും, അവ കാനഡയിൽ വിൽക്കുന്നതിന് മുമ്പ് ഹെൽത്ത് കാനഡയുടെ സുരക്ഷാ-ഗുണനിലവാര പരിശോധനയും ഔദ്യോഗിക അംഗീകാരവും നിർബന്ധമാണ്. എന്നാൽ, പരിശോധനകൾ പൂർത്തിയാക്കാത്തതും അംഗീകാരം ലഭിക്കാത്തതുമായ നിരവധി ഉൽപ്പന്നങ്ങൾ ഓൺലൈനിലൂടെ ഭാരം കുറയ്ക്കൽ, മസിൽ വളർച്ച, ആന്റി-ഏജിംഗ്, ഫിറ്റ്നസ്, ബോഡി ബിൽഡിംഗ് തുടങ്ങിയ അവകാശവാദങ്ങളോടെ വിപണനം ചെയ്തിരുന്നതായി അധികൃതർ വ്യക്തമാക്കി.
ഈ ഉൽപ്പന്നങ്ങളുടെ സുരക്ഷ, ഫലപ്രാപ്തി, ഗുണനിലവാരം എന്നിവ ഹെൽത്ത് കാനഡ വിലയിരുത്തിയിട്ടില്ല. അതിനാൽ, അവ ഉപയോഗിക്കുന്നത് ഗുരുതര ആരോഗ്യപ്രശ്നങ്ങൾക്കും അണുബാധകൾക്കും അലർജി പ്രതികരണങ്ങൾക്കും ഹോർമോൺ അസന്തുലിതാവസ്ഥയ്ക്കും മറ്റ് അപകടകരമായ പാർശ്വഫലങ്ങൾക്കും കാരണമാകാൻ സാധ്യതയുണ്ടെന്ന് മുന്നറിയിപ്പ് നൽകി. ചില ഉൽപ്പന്നങ്ങളിൽ ലേബലിൽ രേഖപ്പെടുത്തിയിരിക്കുന്ന ഘടകങ്ങൾ തന്നെയാണോ അടങ്ങിയിരിക്കുന്നതെന്ന് പോലും ഉറപ്പില്ലെന്നും അധികൃതർ ചൂണ്ടിക്കാട്ടി.
കാനഡയിൽ അംഗീകാരം ലഭിക്കാത്ത മരുന്നുകൾ വിൽക്കുകയോ ഇറക്കുമതി ചെയ്യുകയോ പരസ്യം ചെയ്യുകയോ ചെയ്യുന്നത് Food and Drugs Act പ്രകാരം നിയമവിരുദ്ധമാണ്. പൊതുജനങ്ങളുടെ ആരോഗ്യസുരക്ഷയ്ക്ക് ഭീഷണിയാകുന്ന ഇത്തരം പ്രവർത്തനങ്ങൾക്കെതിരെ ആവശ്യമായാൽ കോടതി ഉത്തരവുകൾ ഉൾപ്പെടെയുള്ള ശക്തമായ നിയമനടപടികൾ സ്വീകരിക്കുമെന്ന് ഹെൽത്ത് കാനഡ അറിയിച്ചു.
അനുമതിയില്ലാത്ത പെപ്റ്റൈഡ് ഉൽപ്പന്നങ്ങൾ വാങ്ങുകയോ ഉപയോഗിക്കുകയോ ചെയ്തിട്ടുള്ളവർക്ക് ആരോഗ്യപ്രശ്നങ്ങൾ അനുഭവപ്പെടുന്നുവെങ്കിൽ ഉടൻ ഡോക്ടറുടെയോ ഫാർമസിസ്റ്റിന്റെയോ ഉപദേശം തേടണമെന്നും അധികൃതർ നിർദേശിച്ചു. മരുന്നുകൾ വാങ്ങുമ്പോൾ ഹെൽത്ത് കാനഡയുടെ അംഗീകാരം ലഭിച്ചതിന്റെ അടയാളമായ എട്ട് അക്ക Drug Identification Number (DIN) ഉണ്ടോ എന്ന് പരിശോധിക്കണമെന്നും ഓൺലൈൻ വഴിയുള്ള പരിചയമില്ലാത്ത വിൽപ്പനക്കാരിൽ നിന്ന് മരുന്നുകൾ വാങ്ങുന്നത് ഒഴിവാക്കണമെന്നും മുന്നറിയിപ്പ് നൽകി.
അനുമതിയില്ലാത്ത മരുന്നുകളുടെ ഓൺലൈൻ വിൽപ്പന തടയുന്നതിനായി നിരീക്ഷണവും പരിശോധനകളും അതിർത്തി നിയന്ത്രണങ്ങളും നിയമനടപടികളും ഹെൽത്ത് കാനഡ കൂടുതൽ ശക്തമാക്കിയിട്ടുണ്ട്. കാനഡക്കാരുടെ ആരോഗ്യസുരക്ഷ ഉറപ്പാക്കുന്നതിനും നിയമവിരുദ്ധ മരുന്ന് വിപണി നിയന്ത്രിക്കുന്നതിനുമായി ഇത്തരം നടപടികൾ തുടരുമെന്നും അധികൃതർ വ്യക്തമാക്കി.