കഴിഞ്ഞ ആറ് പതിറ്റാണ്ടിനിടയിൽ ആഗോള ഭക്ഷണരീതികളിൽ ഉണ്ടായ നാടകീയമായ മാറ്റങ്ങൾ വ്യക്തമാക്കുന്ന പുതിയ യുണൈറ്റഡ് നേഷൻസ് (യുഎൻ) റിപ്പോർട്ട് പുറത്തുവന്നു. ഇതനുസരിച്ച് ഇന്നത്തെ ഒരു ശരാശരി മനുഷ്യൻ 1960-കളുടെ തുടക്കത്തിൽ കഴിച്ചിരുന്നതിനേക്കാൾ ആറിരട്ടിയിലധികം ചിക്കനും രണ്ടിരട്ടി പന്നിയിറച്ചിയും ഉപയോഗിക്കുന്നുണ്ടെന്ന് റിപ്പോർട്ട് വ്യക്തമാക്കുന്നു.
ഒരു വ്യക്തിക്ക് പ്രതിവർഷം ലഭിക്കുന്ന ആഗോള മാംസത്തിന്റെ അളവ് 1961-ലെ 25 കിലോഗ്രാമിൽ നിന്ന് 2022-ൽ 47 കിലോഗ്രാമായി ഉയർന്നതായി ഐക്യരാഷ്ട്രസഭയുടെ ഫുഡ് ആൻഡ് അഗ്രിക്കൾച്ചർ ഓർഗനൈസേഷൻ (എഫ്എഒ) പ്രസിദ്ധീകരിച്ച റിപ്പോർട്ടിൽ പറയുന്നു.
കോഴിയിറച്ചി ഉപഭോഗത്തിലുണ്ടായ ദ്രുതഗതിയിലുള്ള വർധനവാണ് ഇതിന് പ്രധാന കാരണം. കണക്കുകൾ പ്രകാരം, ശരാശരി ചിക്കൻ ലഭ്യത 1961-ൽ ഒരാൾക്ക് 3 കിലോഗ്രാമിൽ താഴെയായിരുന്നത് 2022-ൽ 17 കിലോഗ്രാമായി വർദ്ധിച്ചു. പന്നിയിറച്ചി ഉപഭോഗം രണ്ടിരട്ടിയായി വർദ്ധിച്ച് ഒരാൾക്ക് ഏകദേശം 15 കിലോഗ്രാം എന്ന നിലയിലായി. എന്നാൽ ബീഫ് ഉപഭോഗം വലിയ മാറ്റങ്ങളില്ലാതെ ഒരാൾക്ക് ഏകദേശം 9 കിലോഗ്രാം എന്ന തോതിൽ തന്നെ തുടരുകയാണ്.
വർദ്ധിച്ചുവരുന്ന വരുമാനവും നഗരവൽക്കരണവും ഭക്ഷണശീലങ്ങളിൽ മാറ്റം വരുത്തുന്ന മധ്യവരുമാന രാജ്യങ്ങളിലാണ് പ്രധാനമായും മാംസത്തിനായുള്ള ആഗോള ആവശ്യം ഉയരുന്നത്. വരും വർഷങ്ങളിലും മാംസ ഉപഭോഗം വർദ്ധിച്ചുകൊണ്ടിരിക്കുമെന്നും ഇതിൽ ഏറ്റവും വേഗത്തിൽ വളരുന്ന വിഭാഗമായി കോഴിയിറച്ചി തുടരുമെന്നും എഫ്എഒ പ്രതീക്ഷിക്കുന്നു. എന്നാൽ, ഈ കണ്ടെത്തലുകൾ വർദ്ധിച്ചുവരുന്ന മാംസ ഉപഭോഗം പരിസ്ഥിതിക്ക് വരുത്തിവെക്കുന്ന ആഘാതത്തെക്കുറിച്ചുള്ള ചർച്ചകൾക്ക് വീണ്ടും തുടക്കമിട്ടിരിക്കുകയാണ്.
നിലവിൽ ഹരിതഗൃഹ വാതക പുറന്തള്ളലിന്റെ (ഗ്രീൻഹൗസ് ഗ്യാസ് എമിഷൻ) കാര്യത്തിൽ ലോകത്തിൽ രണ്ടാം സ്ഥാനത്താണ് കാർഷിക മേഖല. അടുത്ത ദശകത്തിൽ ഈ മേഖലയിൽ നിന്നുള്ള വാതക പുറന്തള്ളൽ 7.6 ശതമാനം വർദ്ധിച്ചേക്കാമെന്ന് എഫ്എഒ വിലയിരുത്തുന്നു. ഈ വർദ്ധനവിന്റെ ഏകദേശം 80 ശതമാനവും കന്നുകാലി വളർത്തൽ മൂലമായിരിക്കുമെന്നാണ് കരുതുന്നത്. ആഗോളതലത്തിൽ ഭൂമിയെ ചൂടുപിടിപ്പിക്കുന്ന വാതക പുറന്തള്ളലിന്റെ 12 മുതൽ 20 ശതമാനം വരെ മൃഗസംരക്ഷണ മേഖലയുടെ സംഭാവനയാണെന്നാണ് കണക്കാക്കപ്പെടുന്നത്. കൂടാതെ ജൈവവൈവിധ്യ നാശത്തിനും ഭൂവിനിയോഗ മാറ്റങ്ങൾക്കും ഇത് ഒരു പ്രധാന കാരണമാകുന്നുണ്ട്.
മൃഗങ്ങളിൽ നിന്നുള്ള ഭക്ഷണ ലഭ്യതയിലെ വലിയ അസമത്വങ്ങളും റിപ്പോർട്ട് ചൂണ്ടിക്കാണിക്കുന്നു. സമ്പന്ന രാജ്യങ്ങളിൽ മാംസ ഉപഭോഗം ഉയർന്ന നിരക്കിൽ സ്ഥിരതയോടെ തുടരുമ്പോൾ, പല കുറഞ്ഞ വരുമാനമുള്ള രാജ്യങ്ങളും ഇപ്പോഴും ഇത് വാങ്ങാനുള്ള സാമ്പത്തിക ശേഷിക്കുറവും ഭക്ഷ്യസുരക്ഷാ വെല്ലുവിളികളും നേരിടുന്നുണ്ട്.
കന്നുകാലി വളർത്തലുമായി ബന്ധപ്പെട്ട പാരിസ്ഥിതിക സമ്മർദ്ദങ്ങൾ അംഗീകരിക്കുമ്പോഴും, ഉയർന്ന വരുമാനമുള്ള രാജ്യങ്ങൾ മാംസ ഉപഭോഗം കുറയ്ക്കണമെന്ന് ശുപാർശ ചെയ്യാൻ എഫ്എഒ തയ്യാറായിട്ടില്ല. അതിനുപകരം, കൃഷിയുടെ കാര്യക്ഷമത വർദ്ധിപ്പിക്കുന്നതിലും പാഴാക്കൽ കുറയ്ക്കുന്നതിലും കന്നുകാലികളിൽ നിന്നുള്ള വാതക പുറന്തള്ളൽ കുറയ്ക്കുന്നതിനുള്ള സാങ്കേതികവിദ്യകൾ നടപ്പിലാക്കുന്നതിലുമാണ് സംഘടന ശ്രദ്ധ കേന്ദ്രീകരിച്ചത്.
എന്നാൽ ഈ നിലപാട് ചില ശാസ്ത്രജ്ഞരുടെയും കാലാവസ്ഥാ വിദഗ്ദ്ധരുടെയും വിമർശനത്തിന് കാരണമായിട്ടുണ്ട്. സമ്പന്ന രാജ്യങ്ങളിലെ മാംസ ഉപഭോഗം കുറയ്ക്കുന്നതാണ് വാതക പുറന്തള്ളൽ വെട്ടിക്കുറയ്ക്കാനുള്ള ഏറ്റവും ഫലപ്രദമായ മാർഗ്ഗങ്ങളിലൊന്ന് എന്ന് അവർ വാദിക്കുന്നു. ഭക്ഷണ വ്യവസ്ഥകൾ കാലാവസ്ഥയിലുണ്ടാക്കുന്ന ആഘാതം കുറയ്ക്കുന്നതിനുള്ള പ്രധാന തന്ത്രമായി സസ്യങ്ങൾ അടങ്ങിയ ഭക്ഷണരീതികളിലേക്ക് മാറണമെന്ന് ഇന്റർഗവൺമെന്റൽ പാനൽ ഓൺ ക്ലൈമറ്റ് ചേഞ്ച് (ഐപിസിസി) മുൻപ് ചൂണ്ടിക്കാണിച്ചിട്ടുള്ളതാണ്.