പശ്ചിമ ബംഗാളിൽ ആദ്യമായി ഭാരതീയ ജനതാ പാർട്ടി അധികാരം പിടിച്ചടക്കിയതിനെ “ചരിത്രപരവും നിർണ്ണായകവുമായ” വിജയമെന്ന് വിശേഷിപ്പിച്ച അമേരിക്കൻ പ്രസിഡന്റ് ഡോണൾഡ് ട്രംപ് പ്രധാനമന്ത്രി നരേന്ദ്ര മോദിയെ അഭിനന്ദിച്ചു.
“ഈ ചരിത്രപരമായ വിജയത്തിൽ പ്രസിഡന്റ് പ്രധാനമന്ത്രി മോദിയെ അഭിനന്ദിക്കുന്നു,” വൈറ്റ് ഹൗസ് വക്താവ് കുഷ് ദേശായി അറിയിച്ചു. കേന്ദ്ര തിരഞ്ഞെടുപ്പ് കമ്മീഷന്റെ കണക്കുകൾ പ്രകാരം, 294 അംഗങ്ങളുള്ള ബംഗാൾ നിയമസഭയിൽ 206 സീറ്റുകൾ നേടിയാണ് ബിജെപി ഭൂരിപക്ഷം മറികടന്നത്. ഫൽത്ത മണ്ഡലത്തിലെ വോട്ടെടുപ്പ് മാറ്റിവെച്ചതിനാൽ, 147 ആയിരുന്നു കേവല ഭൂരിപക്ഷത്തിന് വേണ്ട സീറ്റുകൾ.
പത്ത് വർഷത്തിലേറെ നീണ്ടുനിന്ന തൃണമൂൽ കോൺഗ്രസിന്റെ ആധിപത്യത്തിന് അന്ത്യം കുറിച്ചുകൊണ്ട് സംസ്ഥാനത്തെ രാഷ്ട്രീയ ഭൂപടത്തിൽ വലിയ മാറ്റമാണ് ഈ ഫലം ഉണ്ടാക്കിയിരിക്കുന്നത്.
തിരഞ്ഞെടുപ്പിലെ ഏറ്റവും ശ്രദ്ധേയമായ പ്രകടനങ്ങളിലൊന്ന് ബിജെപി നേതാവ് സുവേന്ദു അധികാരിയുടേതായിരുന്നു. ഭവാനിപൂർ, നന്ദിഗ്രാം എന്നീ രണ്ട് സുപ്രധാന മണ്ഡലങ്ങളിലും അദ്ദേഹം വിജയം ഉറപ്പിച്ചു. ഭവാനിപൂരിൽ മുഖ്യമന്ത്രി മമത ബാനർജിയെ 15,105 വോട്ടുകൾക്കാണ് സുവേന്ദു അധികാരി പരാജയപ്പെടുത്തിയത്.
സ്വാതന്ത്ര്യത്തിന് ശേഷം സംസ്ഥാനം കണ്ട ഏറ്റവും ഉയർന്ന പോളിംഗ് ശതമാനമാണ് ഈ തിരഞ്ഞെടുപ്പിൽ രേഖപ്പെടുത്തിയത്. ഒന്നാം ഘട്ടത്തിൽ 92.8 ശതമാനവും രണ്ടാം ഘട്ടത്തിൽ 91.47 ശതമാനവും വോട്ടുകൾ രേഖപ്പെടുത്തി.