സ്റ്റാറ്റിസ്റ്റിക്സ് കാനഡയുടെ പുതിയ പഠനം രാജ്യത്തെ കുടുംബ രൂപീകരണത്തിലെ മാറ്റങ്ങളിലേക്ക് ശ്രദ്ധ ക്ഷണിക്കുന്നു. 2017 മുതൽ 2023 വരെയുള്ള വിവരങ്ങൾ പരിശോധിച്ച റിപ്പോർട്ട്, വ്യക്തികളുടെ വരുമാനം, തൊഴിൽ മേഖല, സാമ്പത്തിക സ്ഥിരത എന്നിവ ആദ്യമായി മാതാപിതാക്കളാകുന്നതുമായി എങ്ങനെ ബന്ധപ്പെട്ടിരിക്കുന്നു എന്ന് വിലയിരുത്തുന്നു.
2023-ൽ ഏറ്റവും ഉയർന്ന കുടുംബവരുമാനമുള്ള വിഭാഗത്തിലെ സ്ത്രീകൾക്ക് ആദ്യ കുഞ്ഞ് ജനിക്കാനുള്ള സാധ്യത 14.1 ശതമാനമായിരുന്നു. ഏറ്റവും കുറഞ്ഞ വരുമാനമുള്ള വിഭാഗത്തിൽ ഇത് 5.6 ശതമാനം മാത്രമാണ്. 2017-ൽ ഉയർന്ന വരുമാനവിഭാഗത്തിലെ സ്ത്രീകൾക്ക് ആദ്യ കുഞ്ഞ് ജനിക്കാനുള്ള സാധ്യത താഴ്ന്ന വരുമാനവിഭാഗത്തേക്കാൾ 2.1 മടങ്ങ് കൂടുതലായിരുന്നെങ്കിൽ, 2023-ൽ ഈ അനുപാതം 2.5 മടങ്ങായി ഉയർന്നു.
പൊതുമേഖലയിൽ ജോലി ചെയ്യുന്ന സ്ത്രീകൾക്ക് മറ്റ് വ്യവസായ മേഖലകളിൽ ജോലി ചെയ്യുന്നവരെക്കാൾ ആദ്യമായി മാതാപിതാക്കളാകാനുള്ള സാധ്യത കൂടുതലാണെന്നും പഠനം കണ്ടെത്തി. 2017-ൽ അഡ്മിനിസ്ട്രേറ്റീവ്, സപ്പോർട്ട്, സർവീസ് മേഖലകളിലെ ജീവനക്കാരെ അപേക്ഷിച്ച് പൊതുമേഖലാ ജീവനക്കാരുടെ സാധ്യത 16.3 ശതമാനം കൂടുതലായിരുന്നു. 2023-ൽ ഈ വ്യത്യാസം 34.3 ശതമാനമായി വർധിച്ചു.
യൂണിയൻ അംഗത്വമുള്ള ജോലികളിലും ആദ്യ കുഞ്ഞ് ജനിക്കാനുള്ള സാധ്യത അൽപം കൂടുതലായിരുന്നു. അതേസമയം, സ്വയംതൊഴിൽ ചെയ്യുന്നവരിൽ സമാനമായ സ്ഥിരതയുള്ള ബന്ധം കണ്ടെത്താനായില്ല.
കുടുംബത്തിന്റെ സാമ്പത്തിക സുരക്ഷയും സ്ഥിരതയുള്ള തൊഴിൽ സാഹചര്യങ്ങളും മാതാപിതാക്കളാകുന്നതിലെ തീരുമാനങ്ങളിൽ കൂടുതൽ പ്രാധാന്യമാർജിക്കുന്നുവെന്നതാണ് റിപ്പോർട്ടിന്റെ പ്രധാന കണ്ടെത്തൽ. എന്നാൽ കുട്ടികളുണ്ടാകാനുള്ള വ്യക്തികളുടെ താൽപര്യങ്ങൾ, ആരോഗ്യസ്ഥിതി, കുടുംബജീവിതവും തൊഴിലും തമ്മിലുള്ള സന്തുലിതാവസ്ഥ തുടങ്ങിയ ഘടകങ്ങൾ പഠനത്തിൽ ഉൾപ്പെടുത്തിയിട്ടില്ലെന്നും സ്റ്റാറ്റിസ്റ്റിക്സ് കാനഡ വ്യക്തമാക്കി.