ദക്ഷിണാഫ്രിക്കൻ ദേശീയ ഫുട്ബോൾ ടീമിന്റെ മിഡ്ഫീൽഡർ ജെയ്ഡൻ ആഡംസ് (25) അന്തരിച്ചു. 2026 ഫിഫ ലോകകപ്പിൽ ദക്ഷിണാഫ്രിക്കയെ പ്രതിനിധീകരിച്ച് കളിച്ച് ആഴ്ചകൾക്കുശേഷമാണ് താരത്തിന്റെ അപ്രതീക്ഷിത വിയോഗം. മരണകാരണം ഇതുവരെ ഔദ്യോഗികമായി സ്ഥിരീകരിച്ചിട്ടില്ല. സംഭവവുമായി ബന്ധപ്പെട്ട സാഹചര്യങ്ങൾ അന്വേഷിച്ചുവരികയാണ്.
ലോകകപ്പിലെ ഗ്രൂപ്പ് ഘട്ടത്തിലെ മൂന്ന് മത്സരങ്ങളിലും ആഡംസ് ദക്ഷിണാഫ്രിക്കയ്ക്കായി കളിച്ചിരുന്നു. മെക്സിക്കോ, ചെക്കിയ ടീമുകൾക്കെതിരായ മത്സരങ്ങളിൽ ആദ്യ ഇലവനിൽ ഇറങ്ങിയ താരം, ദക്ഷിണ കൊറിയക്കെതിരായ മത്സരത്തിൽ പകരക്കാരനായും കളത്തിലിറങ്ങി. ദക്ഷിണാഫ്രിക്ക ആദ്യമായി ലോകകപ്പിന്റെ നോക്കൗട്ട് ഘട്ടത്തിലെത്തുന്നതിൽ ആഡംസ് നിർണായക പങ്കുവഹിച്ചു.
ചെക്കിയക്കെതിരായ ലോകകപ്പ് മത്സരത്തിന് മണിക്കൂറുകൾക്ക് മുമ്പ് മുത്തശ്ശിയുടെ മരണവാർത്ത അറിഞ്ഞിട്ടും ആഡംസ് രാജ്യത്തിനായി കളത്തിലിറങ്ങിയിരുന്നു. വ്യക്തിപരമായ ദുഃഖത്തിനിടയിലും ടീമിനായി കളിക്കാനുള്ള അദ്ദേഹത്തിന്റെ സമർപ്പണവും ധൈര്യവും ഏറെ ശ്രദ്ധ നേടിയിരുന്നു.
ദക്ഷിണാഫ്രിക്കൻ ക്ലബ്ബായ മാമെലോഡി സൺഡൗൺസിന്റെ താരമായിരുന്ന ആഡംസ്, രാജ്യത്തെ ഏറ്റവും പ്രതീക്ഷയുള്ള യുവ ഫുട്ബോൾ താരങ്ങളിൽ ഒരാളായിരുന്നു. സ്റ്റെല്ലൻബോഷ് എഫ്‌സിയിലൂടെ പ്രൊഫഷണൽ കരിയർ ആരംഭിച്ച അദ്ദേഹം പിന്നീട് മാമെലോഡി സൺഡൗൺസിൽ ചേർന്നു. ക്ലബ്ബിന്റെ ആഭ്യന്തര വിജയങ്ങളിലും ആഫ്രിക്കൻ ചാമ്പ്യൻസ് ലീഗ് നേട്ടത്തിലും താരം നിർണായക സംഭാവന നൽകി.
2022-ലാണ് ആഡംസ് ദക്ഷിണാഫ്രിക്കൻ ദേശീയ ടീമിനായി അരങ്ങേറ്റം കുറിച്ചത്. 2026 ലോകകപ്പ് യോഗ്യതാ മത്സരങ്ങളിൽ രാജ്യത്തിനായി രണ്ട് ഗോളുകളും അദ്ദേഹം നേടിയിരുന്നു. മികച്ച പന്തടക്കവും കൃത്യമായ പാസുകളും കളിക്കളത്തിലെ ഊർജസ്വലമായ പ്രകടനവും കൊണ്ട് ആരാധകരുടെ പ്രിയതാരമായി ആഡംസ് മാറി.
ആഡംസിന്റെ അപ്രതീക്ഷിത വിയോഗത്തിൽ ദക്ഷിണാഫ്രിക്കൻ കായിക മന്ത്രാലയം, മാമെലോഡി സൺഡൗൺസ്, ദക്ഷിണാഫ്രിക്കൻ ഫുട്ബോൾ താരങ്ങളുടെ യൂണിയൻ, ഫിഫ പ്രസിഡന്റ് ജിയാനി ഇൻഫാന്റിനോ എന്നിവർ അനുശോചനം രേഖപ്പെടുത്തി. കുടുംബത്തിന്റെയും സഹതാരങ്ങളുടെയും ആരാധകരുടെയും ദുഃഖത്തിൽ പങ്കുചേരുന്നതായി ഫുട്ബോൾ ലോകം അറിയിച്ചു.