ഒന്റാറിയോ പ്രീമിയർ ഡഗ് ഫോർഡ്, പ്രധാനമന്ത്രി മാർക്ക് കാർണിയോട് ഫെഡറൽ ഗ്യാസോലിൻ, ഡീസൽ എന്നിവയ്ക്കുള്ള ഫെഡറൽ ഇന്ധന എക്സൈസ് നികുതി താൽക്കാലികമായി നിർത്തിവച്ച നടപടി സ്ഥിരമാക്കണമെന്ന്ആവശ്യപ്പെട്ടു. ഉയർന്ന ജീവിതച്ചെലവും ഇന്ധനവിലയും നേരിടുന്ന സാഹചര്യത്തിൽ, നികുതി ഇളവ് സ്ഥിരമാക്കുന്നത് രാജ്യത്തുടനീളമുള്ള കുടുംബങ്ങൾക്കും ബിസിനസുകൾക്കും ദീർഘകാല സാമ്പത്തിക ആശ്വാസം നൽകുമെന്ന് ഫോർഡ് പറഞ്ഞു.
മിഡിൽ ഈസ്റ്റ് സംഘർഷത്തെ തുടർന്ന് ആഗോളതലത്തിൽ ക്രൂഡ് ഓയിൽ വിലയിൽ ഉണ്ടായ ചാഞ്ചാട്ടത്തെ തുടർന്നാണ് ഫെഡറൽ സർക്കാർ 2026 ഏപ്രിലിൽ ഗ്യാസോലിൻ, ഡീസൽ എന്നിവയ്ക്കുള്ള ഫെഡറൽ എക്സൈസ് നികുതി താൽക്കാലികമായി നിർത്തിവച്ചത്. നിലവിൽ ഈ ഇളവ് സെപ്റ്റംബർ 7 വരെ മാത്രമാണ് പ്രാബല്യത്തിലുള്ളത്.
നികുതി ഇളവ് അവസാനിപ്പിച്ചാൽ ഇന്ധനവില വീണ്ടും ഉയരാൻ സാധ്യതയുണ്ടെന്നും, അത് ഭക്ഷ്യവസ്തുക്കളുടെ വിലയിലും ചരക്ക് ഗതാഗതച്ചെലവിലും ദൈനംദിന ജീവിതച്ചെലവിലും പ്രതികൂല സ്വാധീനം ചെലുത്തുമെന്നും ഫോർഡ് ചൂണ്ടിക്കാട്ടി. അതിനാൽ രാജ്യത്തിന്റെ സാമ്പത്തിക സാഹചര്യങ്ങൾ കണക്കിലെടുത്ത് ഇളവ് സ്ഥിരമാക്കണമെന്ന് അദ്ദേഹം ആവശ്യപ്പെട്ടു.
നികുതി ഇളവ് സ്ഥിരമാക്കിയാൽ വ്യക്തിഗത വാഹന ഉപയോക്താക്കൾക്കൊപ്പം ട്രക്കിംഗ്, കൃഷി, നിർമ്മാണം, ചെറുകിട ബിസിനസ് മേഖലകൾക്കും വലിയ സാമ്പത്തിക നേട്ടമുണ്ടാകുമെന്നാണ് ഒന്റാറിയോ സർക്കാർ വിലയിരുത്തുന്നത്. ഗതാഗതച്ചെലവ് കുറയുന്നതിലൂടെ ഉപഭോക്തൃ വസ്തുക്കളുടെ വിലക്കയറ്റം നിയന്ത്രിക്കാനും ഇത് സഹായിക്കുമെന്ന് ഫോർഡ് പറഞ്ഞു.
അതേസമയം, ഫെഡറൽ സർക്കാർ ഇളവ് സ്ഥിരമാക്കുന്നതിനെക്കുറിച്ച് ഇതുവരെ അന്തിമ തീരുമാനം പ്രഖ്യാപിച്ചിട്ടില്ല. നിലവിലെ നികുതി ഇളവിന്റെ കാലാവധി അവസാനിക്കുന്നതിന് മുൻപ് സാമ്പത്തിക സ്ഥിതിഗതികൾ, ഇന്ധനവില, ഫെഡറൽ വരുമാനത്തെ ബാധിക്കുന്ന പ്രത്യാഘാതങ്ങൾ എന്നിവ വിലയിരുത്തിയ ശേഷമായിരിക്കും തുടർനടപടികൾ തീരുമാനിക്കുക.
ഇന്ധനവിലയും ജീവിതച്ചെലവും ഇപ്പോഴും കാനഡക്കാർ നേരിടുന്ന പ്രധാന വെല്ലുവിളികളിലൊന്നായതിനാൽ, ഫെഡറൽ സർക്കാരിന്റെ അടുത്ത തീരുമാനം രാജ്യത്തുടനീളമുള്ള വാഹന ഉപയോക്താക്കളും ബിസിനസ് മേഖലയും ഉറ്റുനോക്കുകയാണ്.