ദീർഘകാല പരിചരണ കേന്ദ്രങ്ങളിൽ (LTC) Rapid Test ഉപയോഗിച്ച് സ്ഥലത്തുതന്നെ പരിശോധന നടത്തുന്നത് കാനഡയിൽ പ്രതിവർഷം ഏകദേശം 8,000 എമർജൻസി വിഭാഗം സന്ദർശനങ്ങൾ ഒഴിവാക്കാൻ സഹായിക്കുമെന്ന്പുതിയ ക്ലിനിക്കൽ പരീക്ഷണത്തിന്റെ കണ്ടെത്തൽ.
COVID-19, ഇൻഫ്ലുവൻസ, RSV തുടങ്ങിയ ശ്വാസകോശ വൈറസുകൾക്കുള്ള പരിശോധനാഫലങ്ങൾ ലഭിക്കാൻ നിലവിൽ പല LTC കേന്ദ്രങ്ങളും ദിവസങ്ങളോളം കാത്തിരിക്കേണ്ടി വരുന്നതാണ് പ്രധാന പ്രശ്നമെന്ന് സണ്ണിബ്രൂക്ക് ഹെൽത്ത് സയൻസസ് സെന്ററിലെ ഇൻഫെക്ഷൻ പ്രിവൻഷൻ ആൻഡ് കൺട്രോൾ മെഡിക്കൽ ഡയറക്ടർ ഡോ. ജെറോം ലൈസ് പറഞ്ഞു. പ്രവിശ്യയിൽ പരിശോധനാഫലം ലഭിക്കാൻ ശരാശരി 3 മുതൽ 7 ദിവസം വരെ എടുക്കാറുണ്ട്.
എന്നാൽ LTC കേന്ദ്രങ്ങളിൽ തന്നെ സ്ഥാപിക്കാവുന്ന Rapid PCR പരിശോധനാ ഉപകരണങ്ങൾക്ക് ഏകദേശം 35 മിനിറ്റിനുള്ളിൽ ഫലം നൽകാൻ കഴിയും. സാമ്പിൾ ലാബിലേക്ക് അയയ്ക്കേണ്ടതില്ലെന്നതാണ് ഇതിന്റെ പ്രധാന നേട്ടം.
PROMPT-LTC എന്ന ക്ലിനിക്കൽ ട്രയലിൽ 2024 നവംബർ 12 മുതൽ 2025 മേയ് 2 വരെ 20 LTC കേന്ദ്രങ്ങൾ ഉൾപ്പെടുത്തി. ഇതിൽ 10 കേന്ദ്രങ്ങളിൽ സ്ഥലത്തുതന്നെ PCR പരിശോധനയും മറ്റ് 10 കേന്ദ്രങ്ങളിൽ സാധാരണ രീതിയിലുള്ള പുറത്തുള്ള ലാബ് പരിശോധനയുമാണ് ഉപയോഗിച്ചത്.
Rapid Test ഉപയോഗിച്ച കേന്ദ്രങ്ങളിൽ ശ്വാസകോശ അണുബാധകളുമായി ബന്ധപ്പെട്ട് ആശുപത്രിയിലെ എമർജൻസി വിഭാഗത്തിലേക്ക് മാറ്റുന്നവരുടെ എണ്ണത്തിൽ 11 ശതമാനം കുറവ് രേഖപ്പെടുത്തി. 100 കിടക്കകൾക്ക് ഏകദേശം നാല് ആശുപത്രി മാറ്റങ്ങൾ കുറയുന്നതിന് തുല്യമാണിത്. ഈ രീതി കാനഡയിലുടനീളം വ്യാപകമായി നടപ്പാക്കിയാൽ നവംബർ മുതൽ മാർച്ച് വരെയുള്ള കാലയളവിൽ പ്രതിവർഷം ഏകദേശം 8,000 ആശുപത്രി മാറ്റങ്ങൾ ഒഴിവാക്കാൻ കഴിയുമെന്നാണ് ഗവേഷകരുടെ കണക്ക്.
ശ്വാസകോശ വൈറസ് വ്യാപനം ഏറ്റവും കൂടുതലായിരുന്ന ഡിസംബർ, ജനുവരി മാസങ്ങളിൽ ആശുപത്രി മാറ്റങ്ങളോ മരണങ്ങളോ 100 കിടക്കയ്ക്ക് 28 ശതമാനം കുറഞ്ഞതായും പഠനം കണ്ടെത്തി.
പരിശോധനാഫലം വേഗത്തിൽ ലഭിച്ചതോടെ ചികിത്സയും നേരത്തെ ആരംഭിക്കാൻ സാധിച്ചു. ഇൻഫ്ലുവൻസ സ്ഥിരീകരിച്ച രോഗികൾക്ക് ആന്റിവൈറൽ മരുന്നായ Tamiflu ശരാശരി അര ദിവസത്തിനുള്ളിൽ നൽകാൻ കഴിഞ്ഞപ്പോൾ, സാധാരണ പരിശോധനാ രീതിയിൽ ഇത് ഏകദേശം മൂന്ന് ദിവസം വരെ എടുത്തിരുന്നു.
നെഗറ്റീവ് ഫലം ലഭിക്കുന്ന സാഹചര്യത്തിൽ ആവശ്യത്തിലധികം ദിവസങ്ങൾ രോഗികളെ ഐസൊലേഷനിൽ നിർത്തേണ്ടിവരുന്നതും ഒഴിവാക്കാനാകുമെന്ന് ഗവേഷകർ ചൂണ്ടിക്കാട്ടി. ഇതിലൂടെ രോഗികൾക്കും കുടുംബങ്ങൾക്കും ആരോഗ്യപ്രവർത്തകർക്കും കൂടുതൽ വേഗത്തിൽ കൃത്യമായ ചികിത്സാ തീരുമാനങ്ങൾ എടുക്കാൻ കഴിയുമെന്ന് പഠനം വ്യക്തമാക്കുന്നു.