കാനഡയുടെ ഇമിഗ്രേഷൻ അപേക്ഷാ ബാക്ക്‌ലോഗിൽ ഗണ്യമായ കുറവുണ്ടായതായി ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) പുറത്തുവിട്ട പുതിയ കണക്കുകൾ വ്യക്തമാക്കുന്നു. ഫെബ്രുവരി 28 വരെയുള്ള കണക്കനുസരിച്ച്, വിവിധ വിസ അപേക്ഷകളിൽ തീർപ്പാകാതെ കിടക്കുന്നവയുടെ എണ്ണം കഴിഞ്ഞ മാസത്തെ അപേക്ഷിച്ച് 48,900 കുറഞ്ഞ് 941,400-ൽ എത്തി. കഴിഞ്ഞ പത്തുമാസത്തിനിടയിലെ ഏറ്റവും കുറഞ്ഞ നിരക്കാണിത്. വർക്ക് പെർമിറ്റ്, വിസിറ്റർ വിസ, എക്സ്പ്രസ് എൻട്രി തുടങ്ങിയ വിഭാഗങ്ങളിൽ കാര്യക്ഷമമായ നടപടികൾ സ്വീകരിച്ചതാണ് അപേക്ഷകൾ വേഗത്തിൽ പ്രോസസ്സ് ചെയ്യാൻ സഹായിച്ചതെന്ന് വകുപ്പ് അറിയിച്ചു.

നിലവിൽ ഐആർസിസിയിലെ ആകെ അപേക്ഷകളുടെ എണ്ണം 2,092,700 ആണ്. ഇതിൽ 1,151,300 അപേക്ഷകൾ നിശ്ചിത സേവന മാനദണ്ഡങ്ങൾക്കുള്ളിൽ പൂർത്തിയാക്കാൻ വകുപ്പിന് സാധിച്ചു. വർക്ക് പെർമിറ്റ് അപേക്ഷകളിൽ തീർപ്പാകാത്തവയുടെ എണ്ണത്തിൽ 11 ശതമാനവും സന്ദർശക വിസ വിഭാഗത്തിൽ 6 ശതമാനവും കുറവുണ്ടായി. എക്സ്പ്രസ് എൻട്രി, സ്റ്റഡി പെർമിറ്റ് വിഭാഗങ്ങളിൽ 4 ശതമാനം വീതം കുറവാണ് രേഖപ്പെടുത്തിയിരിക്കുന്നത്. കഴിഞ്ഞ വർഷം ഒക്ടോബറിൽ പത്തുലക്ഷം കടന്ന ബാക്ക്‌ലോഗ് നിരക്കാണ് ഇപ്പോൾ കുറഞ്ഞു വരുന്നത്.

സ്ഥിരതാമസത്തിനായുള്ള (PR) അപേക്ഷകളുടെ എണ്ണത്തിൽ ചെറിയ വർദ്ധനവ് രേഖപ്പെടുത്തിയിട്ടുണ്ട്. ഫെബ്രുവരി അവസാനത്തോടെ പി.ആർ അപേക്ഷകളുടെ ആകെ എണ്ണം പത്തുലക്ഷം കവിഞ്ഞെങ്കിലും (1,007,400), ഇതിൽ പകുതിയോളം അപേക്ഷകൾ കൃത്യസമയത്ത് പരിശോധിക്കുന്നുണ്ടെന്ന് ഐആർസിസി വ്യക്തമാക്കി. എക്സ്പ്രസ് എൻട്രി വിഭാഗത്തിൽ തീർപ്പാകാതെ കിടക്കുന്ന അപേക്ഷകൾ 11 ശതമാനമായി കുറഞ്ഞത് ഈ രംഗത്തെ വലിയ മുന്നേറ്റമായി കണക്കാക്കപ്പെടുന്നു. 2026 ജനുവരി മുതൽ ഫെബ്രുവരി വരെയുള്ള കാലയളവിൽ 53,400 പുതിയ സ്ഥിരതാമസക്കാരെ കാനഡ സ്വീകരിച്ചു.

താൽക്കാലിക താമസത്തിനായുള്ള വിസ അപേക്ഷകളുടെ ബാക്ക്‌ലോഗിലും പുരോഗതിയുണ്ട്. ഫെബ്രുവരി അവസാനം 344,100 അപേക്ഷകളാണ് ഈ വിഭാഗത്തിൽ തീർപ്പാകാതെ തുടരുന്നത്. പഠന പെർമിറ്റുകളുടെ ബാക്ക്‌ലോഗ് 50-ൽ നിന്ന് 46 ശതമാനമായി കുറഞ്ഞു. അതേസമയം, പൗരത്വത്തിനായുള്ള അപേക്ഷകളുടെ എണ്ണം 260,800 ആയി വർദ്ധിച്ചെങ്കിലും അവ കൈകാര്യം ചെയ്യുന്ന വേഗത വർദ്ധിച്ചതായി കണക്കുകൾ കാണിക്കുന്നു. 2025 ഏപ്രിൽ മുതൽ ഇതുവരെ ഏകദേശം അഞ്ച് ലക്ഷത്തിലധികം പേർക്ക് കാനഡ പൗരത്വം നൽകിയിട്ടുണ്ട്.