കാനഡയിൽ പാസ്‌പോർട്ട് പുതുക്കൽ നടപടികൾ കൂടുതൽ വേഗത്തിലും സൗകര്യപ്രദമായും മാറ്റുന്നതിനായി ഫെഡറൽ സർക്കാർ ഓൺലൈൻ പാസ്‌പോർട്ട് പുതുക്കൽ അപേക്ഷകളിലെ പ്രതിദിന പരിധി (Daily Cap) പൂർണമായും ഒഴിവാക്കി. ഇതോടെ യോഗ്യതയുള്ള കനേഡിയൻ പൗരന്മാർക്ക് ഇനി അപേക്ഷാ പരിധിയെക്കുറിച്ച് ആശങ്കപ്പെടാതെ ഏത് സമയത്തും ഓൺലൈനായി പാസ്‌പോർട്ട് പുതുക്കാൻ സാധിക്കും.
മുമ്പ് പരീക്ഷണാടിസ്ഥാനത്തിൽ നടപ്പാക്കിയിരുന്ന ഈ സേവനത്തിൽ പ്രതിദിനം പരമാവധി 2,000 ഓൺലൈൻ അപേക്ഷകൾ മാത്രമാണ് സ്വീകരിച്ചിരുന്നത്. പുതിയ പ്രഖ്യാപനത്തോടെ ആ നിയന്ത്രണം അവസാനിപ്പിച്ചതായി കുടിയേറ്റ, അഭയാർത്ഥി, പൗരത്വ മന്ത്രി ലെന മെറ്റ്‌ലെജ് ദിയാബ് അറിയിച്ചു. ലക്ഷക്കണക്കിന് കനേഡിയൻ പൗരന്മാർക്ക് ഈ സേവനം പ്രയോജനപ്പെടുമെന്നാണ് സർക്കാർ പ്രതീക്ഷിക്കുന്നത്.
16 വയസോ അതിൽ കൂടുതലോ പ്രായമുള്ളപ്പോൾ ലഭിച്ച, കഴിഞ്ഞ 15 വർഷത്തിനുള്ളിൽ നൽകിയ സാധുവായ അല്ലെങ്കിൽ കാലാവധി കഴിഞ്ഞ കനേഡിയൻ പാസ്‌പോർട്ട് കൈവശമുള്ളവർക്കും, കാനഡയ്ക്കുള്ളിൽ താമസിക്കുന്നവർക്കും ഓൺലൈനായി പുതുക്കലിന് അപേക്ഷിക്കാം. അപേക്ഷ സമർപ്പിക്കുമ്പോൾ അംഗീകൃത ഫോട്ടോഗ്രാഫർ എടുത്ത ഡിജിറ്റൽ പാസ്‌പോർട്ട് ഫോട്ടോ അപ്‌ലോഡ് ചെയ്യേണ്ടതുണ്ട്. നിലവിൽ പാസ്‌പോർട്ട് അടുത്ത ആറുമാസത്തിനുള്ളിൽ കാലഹരണപ്പെടുന്നതോ ഇതിനകം കാലാവധി കഴിഞ്ഞതോ ആയിരിക്കണം ഓൺലൈൻ പുതുക്കലിന് അർഹത നേടാൻ.
ഓൺലൈൻ സംവിധാനത്തിലൂടെ അപേക്ഷിക്കുന്നവർക്ക് അപേക്ഷയുടെ പുരോഗതി തത്സമയം (real-time)പരിശോധിക്കാനും ആവശ്യമായ രേഖകൾ ഡിജിറ്റലായി അപ്‌ലോഡ് ചെയ്യാനും കഴിയും. ഇതിലൂടെ ഒറിജിനൽ രേഖകൾ തപാൽ വഴി അയയ്ക്കേണ്ട ആവശ്യമില്ലാത്തതിനാൽ നടപടികൾ കൂടുതൽ സുരക്ഷിതവും ലളിതവുമായി മാറും.
പൂർണമായ അപേക്ഷകൾ 20 പ്രവൃത്തി ദിവസത്തിനുള്ളിൽ പ്രോസസ് ചെയ്യുക എന്നതാണ് സർക്കാരിന്റെ സേവനലക്ഷ്യം. 30 പ്രവൃത്തി ദിവസത്തിലധികം വൈകിയാൽ അപേക്ഷകർക്ക് പാസ്‌പോർട്ട് ഫീസ് പൂർണമായി തിരികെ നൽകുന്ന “30 Days or Free” ഗ്യാരന്റിയും നിലവിലുണ്ട്. അതേസമയം, അടിയന്തര യാത്ര ആവശ്യമുള്ളവർക്ക് നേരിട്ടോ തപാൽ വഴിയോ അപേക്ഷിക്കാനുള്ള നിലവിലെ സംവിധാനങ്ങൾ തുടരുമെന്നും സർക്കാർ അറിയിച്ചു.