ടൊറന്റോ ഐലൻഡിലേക്കുള്ള ഫെറി ടിക്കറ്റുകൾ വാങ്ങുന്നവരെ ലക്ഷ്യമിട്ട് ഓൺലൈൻ തട്ടിപ്പുകൾ വർധിക്കുന്നതായി മുന്നറിയിപ്പ് നൽകി ടൊറന്റോ നഗരം. വ്യാജ വെബ്‌സൈറ്റുകളും സമൂഹമാധ്യമങ്ങളിലെ വ്യാജ പരസ്യങ്ങളും ഉപയോഗിച്ച് കുറഞ്ഞ നിരക്കിൽ ടിക്കറ്റുകൾ വാഗ്ദാനം ചെയ്ത് പണം തട്ടിയെടുക്കുന്ന സംഭവങ്ങൾ റിപ്പോർട്ട് ചെയ്തതിനെ തുടർന്നാണ് അധികൃതരുടെ മുന്നറിയിപ്പ്.
സമീപകാലത്ത് ടൊറന്റോ ഐലൻഡ് ഫെറി ടിക്കറ്റുകൾ വിൽക്കുന്നതായി അവകാശപ്പെടുന്ന നിരവധി വ്യാജ വെബ്‌സൈറ്റുകളും സോഷ്യൽ മീഡിയ പേജുകളും കണ്ടെത്തിയതായി നഗരഭരണം അറിയിച്ചു. ഔദ്യോഗിക വെബ്‌സൈറ്റിന് സമാനമായ രൂപകൽപ്പനയും ലോഗോയും ഉപയോഗിച്ച് ഉപഭോക്താക്കളെ തെറ്റിദ്ധരിപ്പിക്കുന്ന ഇത്തരം തട്ടിപ്പ് സൈറ്റുകൾ പണം കൈപ്പറ്റിയ ശേഷം ടിക്കറ്റുകൾ നൽകാതിരിക്കുകയോ വ്യാജ ഇ-ടിക്കറ്റുകൾ അയയ്ക്കുകയോ ചെയ്യുന്ന സംഭവങ്ങളും റിപ്പോർട്ട് ചെയ്തിട്ടുണ്ട്.
ഇത്തരം സൈറ്റുകളിൽ വ്യക്തിഗത വിവരങ്ങൾ, ക്രെഡിറ്റ് കാർഡ് വിവരങ്ങൾ, ബാങ്ക് വിവരങ്ങൾ എന്നിവ നൽകുന്നത് സാമ്പത്തിക നഷ്ടത്തിനും വ്യക്തിഗത വിവരങ്ങൾ ദുരുപയോഗം ചെയ്യപ്പെടുന്നതിനും ഇടയാക്കുമെന്ന് അധികൃതർ മുന്നറിയിപ്പ് നൽകി. സംശയാസ്പദമായ ലിങ്കുകളിലൂടെയോ ഓൺലൈൻ പരസ്യങ്ങളിലൂടെയോ ലഭിക്കുന്ന ഓഫറുകൾ വിശ്വസിക്കരുതെന്നും അധികൃതർ ആവശ്യപ്പെട്ടു.
ടൊറന്റോ ഐലൻഡിലേക്കുള്ള യാത്രയ്ക്കായി ടിക്കറ്റുകൾ വാങ്ങുന്നവർ ടൊറന്റോ നഗരത്തിന്റെ ഔദ്യോഗിക ടിക്കറ്റ് ബുക്കിംഗ് സംവിധാനത്തിലൂടെ മാത്രം ടിക്കറ്റുകൾ ബുക്ക് ചെയ്യണമെന്നും, മൂന്നാംകക്ഷി വെബ്‌സൈറ്റുകളിലൂടെയോ സാമൂഹികമാധ്യമങ്ങളിലെ വ്യക്തിഗത അക്കൗണ്ടുകളിലൂടെയോ ടിക്കറ്റ് വാങ്ങുന്നത് ഒഴിവാക്കണമെന്നും നഗരഭരണം നിർദേശിച്ചു. ടിക്കറ്റ് വാങ്ങുന്നതിന് മുമ്പ് വെബ്‌സൈറ്റിന്റെ വിലാസം (URL) കൃത്യമായി പരിശോധിക്കുകയും സുരക്ഷിതമായ ഓൺലൈൻ പേയ്‌മെന്റ് സംവിധാനങ്ങൾ മാത്രം ഉപയോഗിക്കുകയും വേണമെന്നും അധികൃതർ ഓർമ്മിപ്പിച്ചു.
വ്യാജ ടിക്കറ്റ് വാങ്ങിയതായി സംശയിക്കുന്നവർ ഉടൻ തന്നെ ബാങ്കിനെയോ ക്രെഡിറ്റ് കാർഡ് കമ്പനിയെോ ബന്ധപ്പെട്ട് ഇടപാട് റിപ്പോർട്ട് ചെയ്യുകയും, സംഭവത്തെക്കുറിച്ച് ടൊറന്റോ നഗരഭരണത്തെയും കാനഡൻ ആന്റി-ഫ്രോഡ് സെന്ററിനെയും അറിയിക്കണമെന്നും അധികൃതർ നിർദേശിച്ചു. പാസ്‌വേഡുകൾ ഉടൻ മാറ്റുകയും ബാങ്ക് അക്കൗണ്ടിലെ ഇടപാടുകൾ നിരന്തരം നിരീക്ഷിക്കുകയും ചെയ്യുന്നതും സുരക്ഷയുടെ ഭാഗമായി നിർണായകമാണെന്ന് അധികൃതർ പറഞ്ഞു.
വേനൽക്കാല അവധിക്കാലത്ത് ടൊറന്റോ ഐലൻഡിലേക്കുള്ള സന്ദർശകരുടെ എണ്ണം ഗണ്യമായി വർധിക്കുന്ന സാഹചര്യത്തിൽ തട്ടിപ്പുകാർ ഈ അവസരം ദുരുപയോഗം ചെയ്യാൻ ശ്രമിക്കാമെന്ന് അധികൃതർ മുന്നറിയിപ്പ് നൽകി. സുരക്ഷിതവും വിശ്വസനീയവുമായ മാർഗങ്ങളിലൂടെ മാത്രം ടിക്കറ്റുകൾ വാങ്ങുകയും സംശയാസ്പദമായ ഓൺലൈൻ ഓഫറുകൾ ഒഴിവാക്കുകയും ചെയ്യണമെന്ന് പൊതുജനങ്ങളോട് ടൊറന്റോ നഗരം വീണ്ടും അഭ്യർഥിച്ചു.