കൊച്ചി: സോഷ്യൽ മീഡിയ താരങ്ങളായ ഹാഷിർ, അലൻ ബിൻ സിറാജ്, അജിൻ ജോയ്, വിനായക് എന്നിവരെ പ്രധാന കഥാപാത്രങ്ങളാക്കി നവാഗതനായ സവിൻ എസ്.എ. സംവിധാനം ചെയ്യുന്ന ‘വാഴ II: ബയോപിക് ഓഫ് ബില്യൺ ബ്രോസ്’ എന്ന ചിത്രത്തിന്റെ ഔദ്യോഗിക ട്രെയ്‌ലർ പുറത്തിറങ്ങി. ഏപ്രിൽ 2-ന് ചിത്രം ആഗോളതലത്തിൽ തിയേറ്ററുകളിൽ പ്രദർശനത്തിനെത്തും. ബോക്‌സ് ഓഫീസിൽ വലിയ വിജയം നേടിയ ‘വാഴ’യുടെ രണ്ടാം ഭാഗമായാണ് ഈ ചിത്രം ഒരുങ്ങുന്നത്. ഹിറ്റ് സംവിധായകൻ വിപിൻ ദാസ് തിരക്കഥയും സംഭാഷണവും നിർവ്വഹിച്ചിരിക്കുന്ന ചിത്രം സൗഹൃദത്തിന്റെയും നോസ്റ്റാൾജിയയുടെയും പശ്ചാത്തലത്തിലാണ് കഥ പറയുന്നത്. ഡബ്ല്യു.ബി.ടി.എസ്. പ്രൊഡക്ഷൻസ്, ഇമാജിൻ സിനിമാസ് തുടങ്ങി വിവിധ ബാനറുകൾ ചേർന്നാണ് ചിത്രം നിർമ്മിച്ചിരിക്കുന്നത്.

ആദ്യ ഭാഗത്തിലെ യുവതാരങ്ങൾക്കൊപ്പം മലയാളത്തിലെ പ്രമുഖ നടന്മാരും സോഷ്യൽ മീഡിയ വൈറൽ താരങ്ങളും ഈ ചിത്രത്തിൽ അണിനിരക്കുന്നുണ്ട്. സുധീഷ്, വിജയ് ബാബു, അജു വർഗ്ഗീസ്, അൽഫോൻസ് പുത്രൻ, ബിജു കുട്ടൻ തുടങ്ങിയ പ്രമുഖർ ചിത്രത്തിൽ പ്രധാന വേഷങ്ങളിൽ എത്തുന്നു. ചിത്രത്തിലെ ഗാനങ്ങൾ ഇതിനോടകം തന്നെ സോഷ്യൽ മീഡിയ പ്ലാറ്റ്‌ഫോമുകളിൽ ട്രെൻഡിംഗാണ്. 10 ഗാനങ്ങളുള്ള ചിത്രത്തിനായി മലയാളി മങ്കിസ്, രജത് പ്രകാശ് തുടങ്ങി 9 സംഗീത സംവിധായകരാണ് സംഗീതം നിർവ്വഹിച്ചിരിക്കുന്നത്. അങ്കിത് മേനോനാണ് മ്യൂസിക് സൂപ്പർവിഷൻ കൈകാര്യം ചെയ്തിരിക്കുന്നത്. തിങ്ക് മ്യൂസിക്കാണ് ഓഡിയോ റൈറ്റ്‌സ് സ്വന്തമാക്കിയിരിക്കുന്നത്.

സാങ്കേതിക വശങ്ങളിൽ മികച്ച നിലവാരം പുലർത്തുന്ന ചിത്രത്തിന്റെ ഛായാഗ്രഹണം അഖിൽ ലൈലാസുരനും എഡിറ്റിംഗ് കണ്ണൻ മോഹനുമാണ് നിർവ്വഹിച്ചിരിക്കുന്നത്. ഐക്കൺ സിനിമാസാണ് ചിത്രം വിതരണത്തിന് എത്തിക്കുന്നത്. ആദ്യ ഭാഗത്തിന്റെ വൻ വിജയത്തിന് ശേഷം എത്തുന്ന രണ്ടാം ഭാഗം വലിയ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്. പ്രൊഡക്ഷൻ കൺട്രോളർ റിന്നി ദിവാകർ, കല ബാബു പിള്ള, മേക്കപ്പ് സുധി സുരേന്ദ്രൻ എന്നിവരടങ്ങുന്ന വലിയൊരു സാങ്കേതിക നിര തന്നെ ചിത്രത്തിന് പിന്നിൽ പ്രവർത്തിക്കുന്നുണ്ട്.