അത്യാധുനിക ഓഡിയോ മോഡലായ ‘ജെമിനി 3.5 ലൈവ് ട്രാൻസ്ലേറ്റ്’ പുറത്തിറക്കി ഗൂഗിൾ.
വോയ്സ് വിവർത്തന ടൂളുകൾ ഉപയോഗിക്കുന്നവർ നേരിടുന്ന ഏറ്റവും വലിയ പ്രശ്നങ്ങളിലൊന്നായ വിവർത്തനത്തിന്റെ മന്ദഗതിക്ക് പരിഹാരവുമായി ഗൂഗിൾ. നിങ്ങൾ ഒരു വാചകം പറഞ്ഞു കഴിഞ്ഞ് വിവർത്തനത്തിനായി കാത്തിരിക്കേണ്ടി വരുന്ന അവസ്ഥയും അതുമൂലമുണ്ടാകുന്ന അസ്വസ്ഥതകളും ഇല്ലാതാക്കാൻ തങ്ങളുടെ അത്യാധുനിക ഓഡിയോ മോഡലായ ‘ജെമിനി 3.5 ലൈവ് ട്രാൻസ്ലേറ്റ്’ (Gemini 3.5 Live Translate) ഗൂഗിൾ പുറത്തിറക്കി.
സംഭാഷണങ്ങൾ നടക്കുമ്പോൾ തന്നെ അവ തത്സമയം വിവർത്തനം ചെയ്യാൻ പാകത്തിലാണ് ജെമിനി 3.5 ലൈവ് ട്രാൻസ്ലേറ്റ് രൂപകൽപ്പന ചെയ്തിരിക്കുന്നത് എന്ന് ഗൂഗിൾ വ്യക്തമാക്കുന്നു. കമ്പനിയുടെ കണക്കനുസരിച്ച് 70-ലധികം ഭാഷകളിൽ ഈ സേവനം ലഭ്യമാകും.
സംസാരിക്കുന്നയാൾ പറഞ്ഞു തീരുന്നതുവരെ കാത്തിരുന്ന് മാത്രം മറുപടി നൽകുന്ന പഴയ വിവർത്തന രീതികളിൽ നിന്ന് തികച്ചും വ്യത്യസ്തമാണ് ജെമിനി 3.5 ലൈവ് ട്രാൻസ്ലേറ്റ്. ഇതിൽ നിങ്ങൾ സംസാരിച്ചു തുടങ്ങുന്ന നിമിഷം മുതൽ തന്നെ മോഡൽ ശബ്ദം പ്രോസസ്സ് ചെയ്യുകയും തുടർച്ചയായി വിവർത്തനം ചെയ്ത ഓഡിയോ ലഭ്യമാക്കുകയും ചെയ്യും.
ഉയർന്ന നിലവാരത്തിലുള്ള വിവർത്തനത്തിന് ആവശ്യമായ പശ്ചാത്തലം മനസ്സിലാക്കാൻ കാത്തിരിക്കുന്നതിനൊപ്പം തന്നെ, നിങ്ങളുടെ സംസാരത്തിന്റെ വേഗതയ്ക്കൊപ്പം സഞ്ചരിക്കാനും ഈ മോഡലിന് സാധിക്കുമെന്ന് ഗൂഗിൾ പറയുന്നു. “സംഭാഷണങ്ങൾക്കിടയിൽ അനാവശ്യമായ തടസ്സങ്ങളോ മുറിഞ്ഞ ഓഡിയോയോ ഇനി ഉണ്ടാകില്ല, ഭാഷാ അതിർവരമ്പുകളില്ലാതെ യഥാർത്ഥ ആശയവിനിമയം സാധ്യമാകും,” ഗൂഗിൾ കൂട്ടിച്ചേർത്തു.
ആപ്പിളിന്റെ ലൈവ് ട്രാൻസ്ലേഷൻ ഫീച്ചറിൽ ഇതിന് സമാനമായ സംവിധാനമുണ്ടെങ്കിലും അത് വളരെ കുറച്ച് ഭാഷകളിൽ മാത്രമായി പരിമിതപ്പെടുത്തിയിരിക്കുന്നു. എന്നാൽ ജെമിനി 3.5 ലൈവ് ട്രാൻസ്ലേറ്റ് നിങ്ങളുടെ സംസാരത്തിന്റെ ശൈലി, വേഗത, ടോൺ എന്നിവ അതേപടി നിലനിർത്താൻ രൂപകൽപ്പന ചെയ്തതാണ്.
അതുകൊണ്ട് തന്നെ ഒരു റോബോട്ടിക് ശബ്ദത്തിന് പകരം സ്വാഭാവികമായ ഓഡിയോയാണ് ഇത് നൽകുന്നത്. ഈ മോഡലുകൾ നിർമ്മിക്കുന്ന എല്ലാ ഓഡിയോ ഔട്ട്പുട്ടുകളിലും സിന്ത്ഐഡി (SynthID) ഉപയോഗിച്ച് വാട്ടർമാർക്ക് ചെയ്തിട്ടുണ്ടെന്നും ഗൂഗിൾ വ്യക്തമാക്കി. സാധാരണക്കാർക്ക് തിരിച്ചറിയാൻ കഴിയാത്ത രീതിയിൽ ഓഡിയോയിൽ നേരിട്ട് ഉൾപ്പെടുത്തിയിരിക്കുന്ന ഈ വാട്ടർമാർക്ക് എളുപ്പത്തിൽ കണ്ടെത്താൻ സാധിക്കും.
ഇതോടൊപ്പം പുതിയൊരു ‘ലിസണിങ് മോഡ്’ (Listening Mode) കൂടി ഗൂഗിൾ അവതരിപ്പിച്ചിട്ടുണ്ട്. ഹെഡ്ഫോണുകൾ ഇല്ലാത്ത സാഹചര്യത്തിൽ വിവർത്തനം ചെയ്ത ഓഡിയോ കേൾക്കണമെങ്കിൽ ഫോണിന്റെ ഇയർപീസിലൂടെ തന്നെ അത് കേൾക്കാൻ ഈ ഫീച്ചർ സഹായിക്കും. സാധാരണ ഫോൺ കോളുകൾ ചെയ്യുന്നത് പോലെ ഈ മോഡ് ഓൺ ചെയ്ത് ഫോൺ ചെവിയോട് ചേർത്തുപിടിച്ചാൽ മതിയാകും. ഗൂഗിൾ ട്രാൻസ്ലേറ്റ് ആപ്പിലും ഈ ലിസണിങ് മോഡ് ലഭ്യമാക്കും.
