ആൽബർട്ടയിലെ മലയാളി സമൂഹത്തിന്റെ ഏറ്റവും വലിയ സാംസ്‌കാരിക ആഘോഷങ്ങളിലൊന്നായി മാറാനൊരുങ്ങുന്ന ‘മഹാ ഓണം 2026’ന് ഒരുക്കങ്ങൾ പൂർത്തിയാകുന്നു. കനേഡിയൻ കേരള കൾച്ചറൽ അസോസിയേഷൻ ഓഫ് ആൽബർട്ട (CKCAA)യുടെ ആഭിമുഖ്യത്തിൽ സംഘടിപ്പിക്കുന്ന ഈ സ്വർണജൂബിലി ഓണാഘോഷം 2026 ഓഗസ്റ്റ് 1, ശനിയാഴ്ച, സ്റ്റോണി പ്ലെയിനിലെ ഹെറിറ്റേജ് പാർക്കിൽ അരങ്ങേറും.
അമ്പത് വർഷത്തെ സമ്പന്നമായ പ്രവർത്തന പാരമ്പര്യം ആഘോഷിക്കുന്ന CKCAAയുടെ സ്വർണജൂബിലിയുടെ ഭാഗമായി സംഘടിപ്പിക്കുന്ന ഈ മഹാമേള, കേരളത്തിന്റെ പൈതൃകവും ഓണത്തിന്റെ ഐശ്വര്യവും കാനഡയുടെ മണ്ണിൽ പുനരാവിഷ്‌കരിക്കുന്ന വിപുലമായ സാംസ്‌കാരിക വിരുന്നായിരിക്കും.
ദിനം മുഴുവൻ നീളുന്ന ആഘോഷത്തിൽ മാവേലിയുടെ രാജകീയ വരവേൽപ്പ്, മെഗാ തിരുവാതിര, പഞ്ചാരിമേളം, പുലിക്കളി, വടംവലി, നാടൻ കലാരൂപങ്ങൾ, വിവിധ മലയാളി സംഘടനകളുടെ കലാപരിപാടികൾ, സംഗീത-നൃത്തവിരുന്നുകൾ, കുട്ടികൾക്കും കുടുംബങ്ങൾക്കുമായി വിനോദപരിപാടികൾ, ആകർഷകമായ മത്സരങ്ങൾ, വൈവിധ്യമാർന്ന ഭക്ഷ്യമേള, കൂടാതെ പരമ്പരാഗത വിഭവങ്ങളോടുകൂടിയ ഓണസദ്യ എന്നിവ ഉൾപ്പെടെ നിരവധി പരിപാടികൾ ഒരുക്കിയിട്ടുണ്ട്.
ആൽബർട്ടയുടെ വിവിധ ഭാഗങ്ങളിൽ നിന്നുള്ള മലയാളി കുടുംബങ്ങളെ ഒരേ വേദിയിൽ ഒന്നിപ്പിക്കുന്ന ഈ ആഘോഷം, തലമുറകളെ ബന്ധിപ്പിക്കുന്ന സാംസ്‌കാരിക സംഗമമായും മാറും. സൗഹൃദവും സഹോദര്യവും പൈതൃകവും ആഘോഷിക്കുന്ന ഈ മഹാമേളയിൽ എല്ലാ ദേശീയതകളിൽപ്പെട്ടവർക്കും പങ്കെടുക്കാൻ അവസരമുണ്ടാകും.
“ഒരുമയുടെ ആഘോഷം… പാരമ്പര്യത്തിന്റെ അഭിമാനം… ഓണത്തിന്റെ മഹോത്സവം…” എന്ന സന്ദേശവുമായി എത്തുന്ന മഹാ ഓണം 2026, ഓണാഘോഷങ്ങളുടെ ചരിത്രത്തിൽ മറ്റൊരു അഭിമാന അധ്യായം കുറിക്കുമെന്ന് സംഘാടകർ പ്രതീക്ഷിക്കുന്നു.

📅 തീയതി: 2026 ഓഗസ്റ്റ് 1 (ശനിയാഴ്ച)

📍 വേദി: Heritage Park, 5100 41 Ave, Stony Plain, Alberta

ടിക്കറ്റുകൾ ഇപ്പോൾ ലഭ്യമാണ്. പോസ്റ്ററിലെ QR കോഡ് സ്കാൻ ചെയ്ത് മുൻകൂട്ടി ബുക്ക് ചെയ്ത് ഈ ചരിത്രപരമായ ആഘോഷത്തിന്റെ ഭാഗമാകൂ.