കാനഡയിലേക്കുള്ള സ്ഥിരതാമസത്തിനായുള്ള എക്സ്പ്രസ് എൻട്രി സംവിധാനത്തിൽ ഫ്രഞ്ച് ഭാഷാ പ്രാവീണ്യമുള്ള ഉദ്യോഗാർഥികൾക്കായി ജൂലൈ 22-ന് നടത്തിയ ഏറ്റവും പുതിയ ഡ്രോയിൽ 5,000 ഉദ്യോഗാർഥികൾക്ക് സ്ഥിരതാമസത്തിന് അപേക്ഷിക്കാൻ (ITA) ക്ഷണം നൽകി. ഈ ഡ്രോയിലെ ഏറ്റവും കുറഞ്ഞ Comprehensive Ranking System (CRS) സ്കോർ 399 ആയിരുന്നു. ഈ വർഷത്തെ ഏറ്റവും ശ്രദ്ധേയമായ ഫ്രഞ്ച് ഭാഷാ ഡ്രോകളിലൊന്നായി ഇതിനെ വിലയിരുത്തുന്നു.
ഫ്രഞ്ച് ഭാഷയിൽ മികച്ച പ്രാവീണ്യമുള്ള വിദഗ്ധരെ കാനഡയിലേക്ക് കൂടുതൽ ആകർഷിക്കുകയെന്ന ലക്ഷ്യത്തോടെയാണ് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) ഈ വിഭാഗം അടിസ്ഥാനമാക്കിയുള്ള തിരഞ്ഞെടുപ്പ് നടത്തിയത്. ക്യൂബെക്കിന് പുറത്തുള്ള ഫ്രാങ്കോഫോൺ സമൂഹങ്ങളെ ശക്തിപ്പെടുത്തുകയും തൊഴിൽ ക്ഷാമം നേരിടുന്ന മേഖലകളിലേക്ക് കൂടുതൽ വൈദഗ്ധ്യമുള്ള കുടിയേറ്റക്കാരെ എത്തിക്കുകയുമാണ് ഈ പദ്ധതിയുടെ പ്രധാന ലക്ഷ്യം.
ജൂലൈ 22-ലെ ഡ്രോയിൽ ക്ഷണം ലഭിക്കാൻ കുറഞ്ഞത് 399 CRS പോയിന്റ് ആവശ്യമായിരുന്നു. സമാന സ്കോർ നേടിയ ഒന്നിലധികം ഉദ്യോഗാർഥികൾ ഉണ്ടായാൽ, എക്സ്പ്രസ് എൻട്രി പ്രൊഫൈൽ ആദ്യം സമർപ്പിച്ചവർക്കാണ് മുൻഗണന ലഭിക്കുന്ന ടൈ-ബ്രേക്കിംഗ് നിയമവും ഈ ഡ്രോയിൽ പ്രാബല്യത്തിലുണ്ടായിരുന്നു.
ഈ ആഴ്ച മാത്രം തുടർച്ചയായി മൂന്ന് എക്സ്പ്രസ് എൻട്രി ഡ്രോകളാണ് IRCC നടത്തിയത്. ജൂലൈ 20-ന്പ്രൊവിൻഷ്യൽ നോമിനി പ്രോഗ്രാമിലൂടെ 511 പേർക്കും, ജൂലൈ 21-ന് കനേഡിയൻ എക്സ്പീരിയൻസ് ക്ലാസ് (CEC) വിഭാഗത്തിൽ 2,000 പേർക്കും, ജൂലൈ 22-ന് ഫ്രഞ്ച് ഭാഷാ വിഭാഗത്തിൽ 5,000 പേർക്കും ക്ഷണം നൽകി. വിവിധ വിഭാഗങ്ങളെ കേന്ദ്രീകരിച്ച് ലക്ഷ്യമിട്ടുള്ള കുടിയേറ്റ നയമാണ് കാനഡ ഇപ്പോൾ പിന്തുടരുന്നതെന്ന് ഇത് വ്യക്തമാക്കുന്നു.
ഫ്രഞ്ച് ഭാഷാ പ്രാവീണ്യമുള്ള അപേക്ഷകർക്ക് കുറഞ്ഞ CRS സ്കോറിലും സ്ഥിരതാമസത്തിനുള്ള അവസരം ലഭിക്കുന്നതിനാൽ, ഫ്രഞ്ച് പരീക്ഷകൾക്ക് കൂടുതൽ പ്രാധാന്യം നൽകാൻ നിരവധി കുടിയേറ്റ വിദഗ്ധർ നിർദേശിക്കുന്നു. ഭാവിയിലും ഫ്രഞ്ച് ഭാഷാ വിഭാഗത്തിൽ കൂടുതൽ എക്സ്പ്രസ് എൻട്രി ഡ്രോകൾ നടത്തുമെന്നാണ് പ്രതീക്ഷ.