അമേരിക്കൻ വിപണിയിലുള്ള ആശ്രയം കുറച്ച് ആഗോള വ്യാപാരം വിപുലീകരിക്കാനുള്ള നീക്കത്തിന്റെ ഭാഗമായി കാനഡ ഫെഡറൽ സർക്കാർ പുതിയ ‘സ്ട്രാറ്റജിക് എക്സ്പോർട്സ് ഓഫീസ്’ (Strategic Exports Office)ആരംഭിക്കുന്നു. ലോകത്തിന്റെ വിവിധ ഭാഗങ്ങളിലെ വലിയ വ്യാപാര അവസരങ്ങൾ പ്രയോജനപ്പെടുത്താനും കാനഡൻ കമ്പനികൾക്ക് അന്താരാഷ്ട്ര കരാറുകൾ നേടിക്കൊടുക്കാനും ഈ പുതിയ ഓഫീസ് സഹായകരമാകുമെന്ന് സർക്കാർ അറിയിച്ചു.
അന്താരാഷ്ട്ര വ്യാപാര മന്ത്രി മനീന്ദർ സിദ്ധു ഓഫീസ് പ്രഖ്യാപിച്ച് സംസാരിക്കവെ, കാനഡൻ കമ്പനികൾക്ക് വിദേശ വിപണികളിൽ സർക്കാർ തലത്തിലുള്ള പിന്തുണ, നയതന്ത്ര സഹകരണം, ധനസഹായം, വിപണി പ്രവേശന സഹായം എന്നിവ ഒരൊറ്റ സംവിധാനത്തിലൂടെ ലഭ്യമാക്കുകയാണ് ലക്ഷ്യമെന്ന് വ്യക്തമാക്കി. ആഗോള തലത്തിലെ വൻ കരാറുകൾ നേടാൻ സർക്കാർ നേരിട്ട് പിന്തുണ നൽകുന്ന സംവിധാനമായിരിക്കും പുതിയ ഓഫീസ് എന്നും അദ്ദേഹം പറഞ്ഞു.
വ്യോമയാനം, പ്രതിരോധം, ഊർജം, അടിസ്ഥാനസൗകര്യ വികസനം, നിർമാണം തുടങ്ങിയ തന്ത്രപ്രധാന മേഖലകളിൽ കാനഡൻ കമ്പനികൾക്ക് കൂടുതൽ അവസരങ്ങൾ സൃഷ്ടിക്കുന്നതിലും വ്യാപാര തടസങ്ങൾ നീക്കുന്നതിലും പുതിയ ഓഫീസ് പ്രധാന പങ്കുവഹിക്കും. വിവിധ സർക്കാർ വകുപ്പുകൾ, Export Development Canada (EDC), വിദേശ നയതന്ത്ര മിഷനുകൾ എന്നിവയുടെ പ്രവർത്തനങ്ങൾ ഏകോപിപ്പിച്ചായിരിക്കും ഓഫീസ് പ്രവർത്തിക്കുക.
അമേരിക്കയുടെ പുതിയ വ്യാപാര തീരുവകളും അനിശ്ചിതമായ വ്യാപാര സാഹചര്യങ്ങളും കണക്കിലെടുത്ത് കാനഡ മറ്റ് രാജ്യങ്ങളുമായുള്ള വ്യാപാര ബന്ധം ശക്തിപ്പെടുത്താൻ ശ്രമിക്കുന്നതിനിടെയാണ് ഈ പ്രഖ്യാപനം. 2035ഓടെ അമേരിക്കയ്ക്ക് പുറത്തേക്കുള്ള കാനഡയുടെ കയറ്റുമതി ഇരട്ടിയാക്കുക എന്ന ലക്ഷ്യത്തിന്റെ ഭാഗമായാണ് ഈ നീക്കമെന്ന് സർക്കാർ അറിയിച്ചു.
വ്യാപാര വൈവിധ്യവൽക്കരണത്തിലൂടെ കാനഡൻ സമ്പദ്‌വ്യവസ്ഥയെ കൂടുതൽ ശക്തിപ്പെടുത്താനും, പുതിയ വിപണികളിൽ മത്സരശേഷി വർധിപ്പിക്കാനും, രാജ്യത്തിനുള്ളിൽ കൂടുതൽ തൊഴിലവസരങ്ങൾ സൃഷ്ടിക്കാനുമാണ് പുതിയ സ്ട്രാറ്റജിക് എക്സ്പോർട്സ് ഓഫീസിലൂടെ സർക്കാർ ലക്ഷ്യമിടുന്നത്.